Սա մեզ համար անչափ կարևոր հանգրվանային ժողով է, քանի որ ընթանում է այնպիսի պայմաններում, երբ Արցախը ժամանակավորապես կորսված է, իսկ Հայաստանի Հանրապետությունը կանգնած է բավականին լուրջ մարտահրավերների առջև։ Այս ժողովը գումարում ենք՝ ակնկալիքով, որ շատ հարցերի պատասխաններ կստանանք։ Այս մասին ՀՅԴ 35-րդ Ընդհանուր ժողովի բացման պաշտոնական արարողության ժամանակ լրագրողների հետ զրույցում ասաց ԱԺ «Հայաստան» խմբակցության պատգամավոր Գառնիկ Դանիելյանը։
Նա նշեց, որ շատ անելիքներ ունեն, որոնց հետ կապված քննարկելու և որոշումներ կայացնելու հարցեր կան։
Դանիելյանի խոսքով՝ Դաշնակցությունը չի սպասում ընտրություններին․ «Այս ընթացքում Դաշնակցությունը եղել է մի քանի շարժումների առաջամարտիկն ու նախաձեռնողը։ Մենք ոչ թե սպասում ենք հերթական ընտրություններին, այլ ամենօրյա աշխատանք ենք տանում այս իշխանություններին հեռացնելու համար»,– ասաց նա՝ հավելելով․ «Պետք է ամեն ինչ անենք, որ ընտրությունների չհասնեն։ Այս իշխանությունները պատրաստ են ընտրությունները կեղծելուն։ Չեմ կարծում՝ նրանք հանգիստ կգնան ընտրական գործընթացների»։
