Հակակոռուպցիոն կոմիտեն քննչական խուզարկություն է իրականացրել Ավան 5-րդ փողոց 11/1 հասցեում, ոչինչ չի հայտնաբերել, սակայն ձերբակալել են տան բնակիչներից մեկին՝ Հակոբ Ավագյանին՝ հիմնավորելով, թե նա կապ ունի «Ուժեղ Հայաստան»-ի հետ և ներգրավված է կաշառքի գործով։ Այս մասին ահազանգել են NewDay.am-ին։
«Առավոտյան՝ 07:30-ին, մտել են տուն, երեխաների և կանանց աչքի առաջ խուզարկություն իրականացրել, անգամ երեխայի դասագրքերի մեջ են ինչ-որ բան փնտրել, խաղալիք ատրճանակներն են զննել։ Խուզարկություն են իրականացրել նաև Հակոբի վարած մեքենայի մեջ, որի սեփականատերը ինքը չէ։ Մի քանի ժամ խուզարկություն են արել, ոչինչ չեն հայտնաբերել, հիմա ուզում են տանեն կալանքի»,– մանրամասնում է մեզ ահազանգած քաղաքացին։
Ըստ քաղաքացու՝ Հակոբ Ավագյանը «Ուժեղ Հայաստան»-ի գրասենյակի աշխատակից չէ, շտաբներում ներգրավված չէ, առհասարակ կուսակցական չէ։
«Պարզապես շրջապատում գիտեն, որ ընդդիմադիր հայացքներ ունի, քննադատում է Փաշինյանին։ Փաստորեն, հիմա բոլոր ընդդիմադիրների տները կմտնեն ու ինչ-որ պատճառաբանություններով կտանեն կալանքի։ Վախ են տարածում։ Ուզում եմ նշել նաև, որ Հակոբ Ավագյանը վատառողջ է, շաքար ունի»,– նշում է քաղաքացին։
Նշենք, որ ժամը 19։00-ին Հակակոռուպցիոն դատարանը քննելու է Հակոբ Ավագյանի խափանման միջոցը կալանք սահմամենլու հարցը։
Մեր տեղեկություններով՝ այսօր Ավանում այլ ձերբակալվածներ ևս եղել են։
Անի Գևորգյան
