ՀՀԿ փոխնախագահ Արմեն Աշոտյանը ԵՄ գրասենյակի առջև ակցիա է իրականացնում: Նա իր ֆեյսբուքյան էջում տեսանյութ է հրապարակել, որով տեղեկացրել է իր «լուռ և միայնակ» ակցիայի մասին՝ «Երևանում և Բաքվում պահվող հայ պատանդների, ռազմագերիների և քաղաքական բանտարկյալների ազատության» համար:
«Ինչու՞ ԵՄ դեսպանատան մոտ, որովհետև այն արժեքները որոնք քարոզվել և ներկայացվել են որպես ոչ միայն եվրոպական, այլ նաև համամարդկային արժեքներ՝ այսօր ոտնահարվում են, անտեսվում են հենց այն կառույցի կողմից, որ այդ արժեքների ենթադրաբար հիմնական կրողը պետք է լիներ», — ասել է նա, հավելելով՝ համապատասխան ճնշումներ չեն գործադրվում պաշտոնական Բրյուսելից ո՛չ Բաքվի ռեժիմի, ո՛չ էլ Երևանի ռեժիմի նկատմամբ, որպեսզի մի քանի տասնյակ հայորդիներ օր առաջ վերադառնան իրենց ընտանքներ:
Նա հավելել է, որ նրանք այժմ բանտերում են հայտնվել իրենց պայքարի, արժանապատվության, ազատության համար մղվող գործողությունների արդյունքում:
Աշոտյանը պարզաբանել է, որ պայքարի համար ընտրված օրը պատահական չէ: Այսօր Արցախի նախկին նախագահ Բակո Սահակյանի ծննդյան օրն է, 65-ամյակը, որը նա դիմավորելու է իր ընտանիքից հեռու:
Ակցիան տևելու է 1 ժամ:
