Զելենսկին Մարկ Ռյուտեի հետ քննարկել է Ուկրաինային անվտանգության երաշխիքների տրամադրման ուղղությամբ աշխատանքների արագացմանն ուղղված հարցեր

Ուկրաինայի նախագահ Վլադիմիր Զելենսկին հեռախոսազրույց է ունեցել ՆԱՏՕ-ի գլխավոր քարտուղար Մարկ Ռյուտեի հետ։ Այս մասին Զելենսկին հայտնել է իր Telegram ալիքում։

Ուկրաինայի պետության ղեկավարի խոսքով՝ զրույցը «շատ բովանդակալից» էր և վերաբերել է Ուկրաինայի անվտանգության երաշխիքների ուղղությամբ աշխատանքների արագացմանը։

«Կարևոր է ավելի արագ աշխատել Ուկրաինայի անվտանգության երաշխիքների ուղղությամբ։ Կարևոր է Ամերիկայի հետ միասին հնարավորինս արդյունավետ լինել։ Կարևոր է ամրապնդել մեր օդային պաշտպանությունը», — ընդգծել է Զելենսկին։

Նա հավելել է, որ Ուկրաինան և ՆԱՏՕ-ն կշարունակեն համակարգել ջանքերը դիվանագիտական ​​ոլորտում։ «Պուտինը ձևացնում է, թե իրեն խաղաղություն պետք չէ, որ իրեն բանակցություններ պետք չեն, բայց իրականում աշխարհի ճնշումը կարող է ձևավորել Ռուսաստանի շահագրգռվածությունը պատերազմը դադարեցնելու հարցում։ Շնորհակալություն բոլոր նրանց, ովքեր օգնում են», — նշել է նախագահը։