Ամենազազրելին այն է, որ «Քաղաքացիական պայմանագիր»-ը ներկայացրել է ծրագիր, որտեղ ծրագրային դրույթ կա՝ Հայ Առաքելական եկեղեցու առաջնորդին հեռացնելու վերաբերյալ: Այս մասին «Լուսավոր Հայաստան» կուսակցության արտահերթ համագումարի ժամանակ ասել է «Լուսավոր Հայաստան» կուսակցության առաջնորդ Էդմոն Մարուքյանը։
«Մենք ունենք սահմանադրություն, որտեղ հստակ գրված է, թե ինչ դերակատարում ունի եկեղեցին, դա 18-րդ հոդվածն է, որում ասվում է՝ պետությունը ճանաչում է Հայ Առաքելական եկեղեցու բացառիկ առաքելությունը հայ ժողովրդի հոգևոր կյանքում և ազգային ինքնության պահպանման ու մշակույթի զարգացման գործում: Երբ մենք ասում ենք, որ Հայ Առաքելական Սուրբ եկեղեցու դերակատարումը շատ կարևոր է, նկատի ունենք, որ այսօր աշխարհում պետությունների սահմանները թաշկինակի պես փոխվում են, այդ պայմաններում՝ Հայաստանը փոխանակ ասի, որ մենք առաջին քրիստոնյա երկիրն ենք և դիրքավորվի այդ ճանապարհով, Հայաստանի ներսում պայքար է գնում իր որևէ անգամ չդադարող ինստիտուտի՝ մեր եկեղեցու դեմ, ու այդ պայքարը հարվածում է պետականության ողնաշարին:
Եթե դու չունես մշակութային քո ինքնությունը ամրացնող ինքնիշխանություն, դու պետական ինքնիշխանությունից զրկվելու ես։ Հիմա պայքար է գնում այդ ինքնիշխանության դեմ, որից հետո փլուզվելու է ամեն ինչ։ ՔՊ-ն այդ պայմանագիրը իր ծրագրում արդեն ամրագրել է, ասում է՝ տվեք մեզ մանդատ, ու հենց այդ մանդատը ձևավորվի, ասելու է ժողովուրդը մեզ լիազորել է, որ մենք մտնենք ենք Հայ Առաքելական եկեղեցու դաշտ և հեռացնենք կաթողիկոսին, դեռ չեմ պատկերացնում ինչպես, բայց մարդիկ ծրագրում գրել են»,- նշել է Մարուքյանը:
Անդրադառնալով իրենց մասնակցությանը խորհրդարանական ընտրություններին՝ Մարուքյանը պարզաբանեց, որ «Լուսավոր Հայաստանը» ուներ երկու ճանապարհ` չմասնակցեր ընտրություններին, դրանով ապաակտիվացներ իր ընտրական էլեկտորալ հնարավորությունը, հետ մղեր մարդկանց ընտրական տեղամասերից, որ չգնան ընտրություններին, որով կնվազեր ընտրական մասնակցության շեմը և իշխանության համար կստեղծվեր բարենպաստ պայմաններ, և երկրորդ տարբերակը՝ աշխատեր եղած մեկնարկային հնարավորության վրա, պառլամենտում լինելով դերակատար:
