NewDay.am-ին ահազանգել են «Տավուշի Պատրիկ Տէվէճեան տարածաշրջանային քոլեջ» հիմնադրամի աշխատակիցներից մեկը՝ նշելով, որ կրթական հաստատությունում օրենքի մի շարք խախտումներ են արվում։
«Մարտի 30-ին մենք՝ աշխատակիցներս, տեղեկացվել ենք, որ մեր տնօրեն՝ պարոն Հայկ Բրուտյանի լիազորությունները դադարեցվել է հոգաբարձուների խորհրդի որոշմամբ, և նրա փոխարեն նշանակվել է տնօրենի պաշտոնակատար։ Այս որոշման կայացման համար նրանք հիմք են ընդունել պարոն Բրուտյանի աշխատանքային պայմանագրի լրանալը։ Փաստորեն նրան հնարավորություն չի տրվում կատարել իր աշխատանքը մինչև սահմանված կարգով մրցույթի անցկացումը»,- նշված է մեզ ուղարկած նամակի մեջ։
Հիմնադրամի աշխատակցի խոսքով՝ ամբողջությամբ ոտնահարվել է ՀՀ «Մասնագիտական կրթության և ուսուցման մասին» օրենքի երրորդ գլխի 28-րդ հոդվածը, համաձայն որի՝ պետական ՄՈՒՀ-ի տնօրենի ընտրության մրցույթը հայտարարվում է տնօրենի պայմանագրի ժամկետը լրանալու օրվանից ոչ շուտ, քան երեք և ոչ ուշ, քան երկու ամիս առաջ։
«Ինչպես տեսնում ենք, այստեղ կա լուրջ իրավախախտում։ Նշենք նաև այն, որ ՀՀ օրենսդրությունը թույլ է տալիս, որպեսզի տնօրենն աշխատեր մինչև սահմանված կարգով մրցույթի անցկացումը։ Հետևաբար մեզ մոտ լուրջ հարց է առաջանում, թե ինչու՞ նախապատվությունը չտրվեց շատ ավելի փորձառու, բանիմաց, իր աշխատանքը գերազանց կատարող, ազնիվ, մեզ՝ աշխատակիցներիս մշտապես օգնելու և աջակցելու պատրաստակամ տնօրենին շարունակել աշխատել, այլ նախապատվությունը տրվեց այլ անձի։ Մենք հոգաբարձուների խորհրդի որոշումը համարում ենք խիստ ապօրինի և չհիմնավորված»,- մանրամասնել է կրթական հիմնադրամի աշխատակիցը։
Ըստ նրա՝ նման որոշումներին կողմ են քվեարկում հիմնականում ֆրանսիական կողմի ներկայացուցիչները։
«Մինչ այս որոշումն էլ կրկին ֆրանսիական կողմի ցանկությամբ և աջակցությամբ քոլեջում կատարվել են մի շարք այլ փոփոխություններ։ Մասնավորապես՝ քոլեջի մի շարք լավ մասնագետներից վերցվել են իրենց դասաժամերը և հատկացվել այլ մասնագետների, որոնք, իմ կարծիքով, իրենց գիտելիքներով ակնհայտ զիջում են նրանց։ Այս ուսումնական տարվանից սկսված քոլեջում ներդրվել է բլոկային ուսուցումը (նույն դասախոսը նույն առարկան 8 դասաժամ դասավանդում է նույն կուրսի հետ), որն անարդյունավետ է և խաթարում է ուսումնական գործընթացը»,- մանրամասնում է աշխատակիցը։
Աշխատակցի խոսքով՝ բազմաթիվ խնդիրներ կան մի շարք մասնագիտական առարկաների դասաժամերի կրճատման, ուսուցիչների աշխատավարձերի շեշտակի տարբերության և աշխատավարձերի ուշացման հետ կապված։
Նշենք, որ ստացված ահազանգի հետքերով նաև նշված NewDay.am-ը զանգահարեց նաև քոլեջ, որտեղից ասացին, որ մեկնաբանություն կտան ավելի ուշ։
«Ես աշխատակից եմ, Ձեր հարցերը կփոխանցեմ տնօրենի ԺՊ-ին, կամ կհասկանանք ՝ ով կպատասխանի։ Հիմա արդեն աշխատանքային ժամ չէ, ավելի ուշ Ձեզ կպատասխանեն, ես իրավասու չեմ․ ամբողջական տեղեկատվության չեմ տիրապետում»,-նշեց զանգին պատասխանած աշխատակիցը։
