8 միլիարդ թալանված, ստվերում գտնվող գումար ես վերադարձել եմ Հայաստանի պետական բյուջե: Այն գումարները, որ իրենց գրպանն էր հոսում, իրենց գրպանը չի հոսում, ձեր գրպանն է հոսում: Այս մասին Կոտայքի մարզում, «Քաղաքացիական պայմանագիր» կուսակցության քարոզարշավի ժամանակ ասել է Նիկոլ Փաշինյանը:
«Ո՞նց է հոսում ձեր գրպանը, թոշակների ձևով: Ես 8 տարի վարչապետ եմ, 7 տարբեր որոշումով անդրադարձել եմ թոշակին, նվազագույն թոշակը եռապատկել ենք: Ո՞նց է հոսում ձեր գրպանը, առողջության ապահովագրության տեսքով։ Սիրելի՛ երիտասարդ մայրիկներ, ձեր մինչև 18 տարեկան երեխեքի առողջապահական նվազագույն կարիքները հոգում է պետական բյուջեն։ Ձեր 65+ տարիքի ծնողների նվազագույն առողջապահական կարիքները հոգում է պետական բյուջեն։
Ինչո՞ւ է այդպես, ժողովուրդ ջան, մի պարզ պատճառով, որովհետև ՀՀ-ն սիրում է իր քաղաքացիներին, սիրում է ձեզ՝ բոլորիդ, երեխաներին, ծնողներին, քույրերին, եղբայրներին և սա է, որ փոխվել է, այդ սերն է, պետության սերը՝ քաղաքացու նկատմամբ և քաղաքացու սերը՝ պետության նկատմամբ, իշխանության սերը՝ ժողովրդի նկատմամբ և ժողովրդի սերը՝ իշխանության նկատմամբ»,-նշել է նա:
Փաշինյանն ասել է, որ բոլոր գյուղերում երեխաները տասնյակներով, հարյուրներով գնում են իրենց մոտ, որովհետև զգում են պետության սերը: Նա ընդգծել է, որ այդ տարիքից երեխաների մեջ սերմանում են սերը՝ պետության նկատմամբ և նրանք ապագայում լինելու են ավելի ուժեղ քաղաքացիներ:
«Իսկ այն մարդիկ եկել, ասում են՝ 300 հազար ադրբեջանցի: Իրենց թվում է, թե մեզ մեղադրում են այդ թեմայով: Իրենք իրականում, լրտեսաբար ուզում են բացեն այդ թեման, ուզում են կոնֆլիկտի և արյունահեղության նոր էջ բացեն, բայց մենք իրար հետ դա թույլ պիտի չտանք, որովհետև պատերազմի եռագլուխ կուսակցությունը պետք է ջախջախվի այս ընտրություններում, բայց ջախջախվի ոչ թե կառավարության առաջ, այլ ժողովրդի առաջ, ձեր առաջ, որովհետև նրանք մեր դեմ չեն, նրանք ձեր դեմ են։
Մենք ո՞վ ենք, մենք ձեր ծառաներն ենք, դուք երբ ուզենաք, ինձ կարող եք փոխել, իսկ երբ հանկարծ դրանցից մեկը ձեզ խաբելով հայտնվեց վարչապետի պաշտոնին, մանավանդ 2018 թվականի հեղափոխության դասը ունենալով, մի տոկոսի շանս ձեզ չեն տա»,-ասել է Փաշինյանը:
Նիկոլ Փաշինյանն ընդգծել է, որ իրենց ընտրելով քաղաքացին ընտրում է ինքն իրեն:
«Այսօր նայում են, ասում են՝ արա, հլը նայեք, «պերաշկի» է ուտում։ Հիվանդնե՛ր, դուք սովորեք, ես «պերաշկի» ուտում եմ, որովհետև Հայաստանի սովորական քաղաքացի եմ, ես ուտում եմ, որովհետև երեխեքն էլ են ուտում և ասում եմ՝ այս ընտրություններում «պերաշկի» ուտողները պետք է ընտրեն «պերաշկի» ուտողներին:
Ձեր ժամանակ թոշակառուն նույնիսկ «պերաշկի» և «կարտոշկա» ուտելու հնարավորություն չուներ, որովհետև 2018 թվին նվազագույն թոշակով, նույնիսկ «պերաշկի» և «կարտոշկա» մի ամսվա համար մի թոշակառուն չէր կարա առնի: Դուք թոշակառուից գողանում էիք, որ սև «իկրայում» զխտկվեք: Մենք ձեզ խեղդելու ենք ձեր սև «իկրայի» մեջ»,-նշել է նա:
