Մեծ ցավով հայտնում եմ, որ տանում են մեր մոնտաժային համակարգիչները և մենք այլևս չենք կարող աշխատել, լրագրողների ասաց «Արմատ մեդիա»-ի գլխավոր խմբագիր Նելլի Ավետիսյանը։
«Մենք կտրվում ենք ուղիղ եթերի, տաղավարային հաղորդումների հնարավորությունից։ Պրոֆեսիոնալ լրագրությամբ մենք չենք կարող զբաղվել, քանի որ իրավապահներն ամբողջ տեխնիկան տանում են»,-ասաց Նելլի Ավետիսյանը։
Նա նշեց, թե իրավապահներն այսպիսիով խոչընդոտում են մեդիայի աշխատանքը։
««Արմատ մեդիա»-ի աշխատանքները պարալիզացվում են։ Սա «Արմատ մեդիա»-ն փակելու քաղաքականություն է»,-ասաց գլխավոր խմբագիրը։
Կայքի խմբագիր Աղավնի Սուքիասյանն էլ հայտնեց, թե իրավապահների աշխատանքի հետևանքով իրենք չեն կարողանալու մուտք գործել իրենց աշխատասենյակներ.
«Սենյակները կնքված կմնան այնքան ժամանակ, մինչև որոշում կկայացվի դրանք բացելու։ Այս պահին «Արմատ մեդիա»-ն փակված վիճակում է»,-ասաց Աղավնի Սուքիասյանը։
Հիշեցնենք, որ այսօր իրավապահները գործողություններ են իրականացնում «Արմատ մեդիա»-ի խմբագրությունում։
