Ուկրաինայի նախագահ Վլադիմիր Զելենսկին ասել է, որ չարժե Ուկրաինային փոզխջում առաջարկել խղճի, ինքնիշխանության, տարածքի եւ անկախության հետ։
Ուկրաինան միշտ եղել է խաղաղարար ջանքերի առաջատար, ասել է Զելենսկին G20-ի գագաթաժողովի մասնակիցներին հղած տեսաուղերձում, որը հրապարակել է նախագահի գրասենյակն իր Թելեգրամում։
«Ես ցանկանում եմ, որպեսզի այս ագրեսիվ պատերազմն ավարտվի արդարացի եւ ՄԱԿ-ի կանոնադրության ու միջազգային իրավունքի հիման վրա, այլ ոչ թե մի ինչ-որ կերպ… Չարժե Ուկրաինային առաջարկել փոխզիջում խղճի, ինքնիշխանության, տարածքի եւ անկախության հետ… Մենք հարգում ենք կանոնները, եւ մենք խոսքի մարդիկ ենք։ Ուկրաինան միշտ եղել է խաղաղարար ջանքերի առաջատար, եւ աշխարհը դա տեսել է։ Եվ եթե Ռուսաստանն ասում է, որ, իբր, ցանկանում է ավարտել այս պատերազմը, թող ապացուցի դա գործողություններով։ Ակնհայտ է, որ Ռուսաստանի խոսքերին վստահել չի կարելի, եւ ոչ մի «Մինսկ-3»-ներ չեն լինի, որոնք Ռուսաստանը կխախտի կնքվելուց անմիջապես հետո»,- ընդգծել է նա։
Ուկրաինայի նախագահի խոսքով՝ ռուսական ագրեսիան կարելի է եւ պետք է կանգնեցնել հենց հիմա։
«Իսկ եթե խաղաղության վերականգնման համար պատասխան քայլեր չարվեն, կնշանակի, որ Ռուսաստանը պարզապես ցանկանում է հերթական անգամ խաբել ձեզ բոլորիդ, խաբել աշխարհին եւ սառեցնել պատերազմը հենց այն ժամանակ, երբ նրա պարտությունները դարձել են հատկապես շոշափելի։ Մենք թույլ չենք տա Ռուսաստանին սպասել, ուժ հավաքել, իսկ հետո ահաբեկչության եւ գլոբալ անկայունության նոր սերիա սկսել։ Վստահ եմ, որ հենց հիմա է պետք եւ կարելի է կանգնեցնել ռուսական ավերիչ պատերազմը»,- ասել է Զելենսկին։
