Իրավապաշտպան Արսեն Բաբայանը ֆեյսբուքյան իր էջում գրում է.
Այսօր, փետրվարի 1-ին, ժամը 16:00-ին Դատարանի Շենգավիթի նստավայրում կայանալու է քաղաքական հետապնդման ենթարկվող Ani Karapetyanի վերաբերյալ քրեական գործի դատական նիստը։ Պաշտպանությունն ապահովում ենք ես և իմ գործընկեր Ռուդիկ Դոլունցը։
Անի Կարապետյանը մեղադրվում է ՀՀ քրեական օրենսգրքի 328-րդ հոդվածի 3-րդ մասի 3-րդ կետով (հաղորդակցական տեխնոլոգիաների օգտագործմամբ զանգվածային անկարգություններ կատարելու հրապարակային կոչեր) և 329-րդ հոդվածի 2-րդ մասի 3-րդ կետով (ատելություն, անհանդուրժողականություն և թշնամանք հրահրելուն ուղղված հրապարակային կոչեր) նախատեսված արարքների կատարման համար։
Պաշտպանական խմբի համոզմամբ քրեական վարույթը նախաձեռնվել է քրեադատավարական կանոնների էական և կոպիտ խախտումներով։ Մեղադրանքի հիմքում դրված ապացույցները բացի այն, որ ոչինչ չեն ապացուցում, ստացվել են քրեադատավարական կանոնների խախտման եղանակով։
Մասնավորապես,
1) ոստիկանության համապատասխան ստորաբաժանման ծառայողն իրականացրել է համացանցի մշտադիտարկում, որի համար լիազորված չէ օրենքով։
2) Զննություն քննչական գործողությունն իրականացվել է առանց տեսաձայնագրման կամ ընթերակաների մասնակցության, ինչը քրեական դատավարության օրենսգրքի 208-րդ հոդվածի 3-րդ մասի և 210-րդ հոդվածի 5-րդ մասի էական և կոպիտ խախտում է։
Քրեական վարույթի նյութերի ամբողջական ուսումնասիրությունը հստակորեն հաստատում է, որ Անի Կարապետյանի նկատմամբ իրականացվում է քաղաքական հետապնդում։
