Իրավապահների գործողությունների մասին կարող ենք ասել, որ իրավապահ համակարգը նույն դիալոգի մեջ է, մի կողմում երկրի վարչապետը հնչեցնում է սպառնալիքներ և խուլիգանական վարքագիծ է դրսևորում, ու բնականաբար իրավապահները դրան չեն արձագանքում, բայց նույն իրավապահները շատ ավելի մեղմ խոսքի, կամ կոշտ քննադատության համար կարող են մարդուն կալանավորել: Այս մասին ԱԺ պատգամավոր Արծվիկ Մինասյանի հետ ճեպազրույցի ժամանակ ասել է փաստաբան Հովհաննես Խուդոյանը:
«Բացի այն, որ ընտրական գործընթացում քաղաքական հարցադրումներ անող մարդուն ցուցադրաբար վիրավորել են, նսեմցրել են, նման անբարոյական հարցեր են հնչեցրել՝ թե ինչու չի զոհվել հարևան երկրի ագրեսիայի պատճառով, նաև այդ անձի նկատմամբ շարունակաբար քրեական հետապնդում է իրականացվում:
Մինչև կետ առ կետ կանդրադառնամ այս ընթացքում եղած խախտումներին, ասեմ, որ ինչու չեք զոհվել հարցադրումը ամբողջ պրոցեսի անկյունաքարային երևույթներից է, հատկապես իրավապահ մարմինների արձագանքի և քաղաքական խոսքի կիզակետում է: Խոսում ենք այն դեպքի ու մարդու մասին, ով չի կիսում խոսոշոր ընդդիմադիր քաղաքական ուժերի տեսակետները և ընդամենը որպես անհատ դուրս է եկել առանձին հարցադրումներ կատարելու, որի հետ կարող են ոչ բոլորը համաձայն լինել»,- նշել է Խուդոյանը:
Անդրադառնալով խախտումներին՝ ԱԺ պատգամավոր Արծվիկ Մինասյանը ևս շեշտել է, որ դրանք ակնհայտ են, մասնավորապես նշել է՝ առավոտից ՔՊ-ն իր իրավապահ համակարգով ընդդիմադիր շտաբներում օպերացիաներ է իրականացնում:
