Ուկրաինական հակամարտության կողմերը ստիպված կլինեն մի քանի «տհաճ որոշումներ» ընդունել Ուկրաինայի տարածքային ամբողջականության հետ կապված։ Այս մասին Թուրքիայի արտգործնախարար Հաքան Ֆիդանը հայտարարել է TRT World հեռուստաալիքին տված հարցազրույցում, որը տեղի է ունեցել Մյունխենի անվտանգության վերջին համաժողովի շրջանակներում, փոխանցում է Euromedia24-ը։
«Իդեալական աշխարհում մենք, իհարկե, կցանկանայինք տեսնել, որ Ուկրաինայի տարածքային ամբողջականությունը պահպանվի, և, ցավոք, պատերազմի այս պահին մենք պետք է որոշակի ընտրություն կատարենք, որոշ տհաճ որոշումներ կայացնենք: Հիմա կողմերը փորձում են այս ընտրությունը կատարել:
Սրանք այն առաջնահերթություններից են, որոնց վրա նրանք շատ կենտրոնացած են աշխատում հենց հիմա: Ամերիկացիները, եվրոպացիները, մենք, ռուսները, ուկրաինացիները՝ բոլորը հիմա նույն հարցն են տալիս մեր առաջնահերթությունների մասին այն պայմաններում, երբ մեզ անհրաժեշտ է հրադադար»,- ասել է Ֆիդանը` պատասխանելով այն հարցին, որ ուկրաինական կարգավորման վերաբերյալ որոշ կողմերի ներկայիս առաջարկները ներառում են տարածքների քննարկում։
Թուրքիայի ԱԳՆ ղեկավարը նշել է, որ «հակամարտության երկու կողմերն էլ ունեն տարբեր նպատակներ և ցանկություններ», և հարցն այն է, թե «արդյոք ԱՄՆ միջնորդությունը կբավարարի հանդիպում կազմակերպելու համար» և սկսելու ուղիղ բանակցային գործընթացը։
