ՔՊ-ական պատգամավոր Անդրանիկ Քոչարյանը լրագրողների հետ զրույցում անդրադարձել է ոչ մարտական պայմաններում բանակի զոհերին:
«Վերջինը շատ ցավալի զոհ էր, թոքաբորբից զինվոր մահացավ ցավալին այն բառը չէ, դա նշանակում է, որ այդ զորամասում պետք է համակարգված խնդիրներ լուծվեն: Անպայման պետք է պատասխանատվության ենթարկվեն այն մարդիկ, որոնց անտարբերության նաև շնորհիվ է, որ այդպիսի երևույթներ առայժմ կան»,- ասաց Քոչարյանը:
Քոչարյանը նաև անդրադարձավ ՔՊ-ական պատգամավոր Հայկ Սարգսյանի բերած նախագծին շահումով խաղերի վերաբերյալ: «Հիշո՞ւմ եք՝ Հայկ Սարգսյանն օրինագիծ էր բերել խաղային բիզնեսին առնչվող: Ես խնդրեցի ինձ ներկայացնեն 22, 23, 24 թվականենրին այդ առնչությամբ ինչ ինքնասպանություններ կան: Ընդամենը մեկ թիվ կար, որ խաղերի հետ առնչվող ինքնասպանություն չկար, հետո ունեինք 2 դեպք, մի տարին մեկ դեպք, հետո երեք դեպք, սրանք շատ ցավալի դեպքեր են»,- ասաց պատգամավորը:
Նա շեշտեց, որ այդ հարցերի լուծումը պետք է կարողանանք գտնել՝ մերժելով կախվածությունը: «Միայն թմրամիջոցից չի կախվածությունը, հեռախոսները գտնում են, վերցնում են, բայց միևնույնն է, գտնում են տարբերակներ, մեկ էլ նայում ես հեռախոսի պարունակությունը ու պարզ է դառնում: Վերջերս էլ զինվորական էր ինքնասպան եղել կախվելու միջոցով Արարատի մարզում, և այնտեղ էլ նայել էին ու պարզվել էր կախվածության հետ առնչություն կա»,- նշեց Քոչարյանը:
