Ուկրաինացի զինծառայողները Լոնդոնում կմասնակցեն Երկրորդ համաշխարհային պատերազմում հաղթանակի 80-ամյակին նվիրված զինվորականների երթին, որը տեղի կունենա մայիսի 5-ին: Այս մասին հայտնել է Մեծ Բրիտանիայի ՊՆ-ն, փոխանցում է Sky News-ը։
Ուկրաինացի զինվորականները կմիանան Թագավորական ռազմածովային նավատորմի, թագավորական ծովային հետևակի, բրիտանական բանակի և Թագավորական ռազմաօդային ուժերի մոտ 1000 բրիտանացի զինծառայողների: Բրիտանիայի ՊՆ-ում նշել են, որ դա կխորհրդանշի Ուկրաինային գլոբալ աջակցությունը։
«Հաղթանակի օրվանից ութսուն տարի անց մենք մեծարելու ենք մեր պատերազմի վետերաններին, մեր մեծագույն սերնդին։ Միանգամայն տեղին է, որ Ուկրաինայի ԶՈւ-ն, որոնք ներկայումս պայքարում են ազատության համար ռազմաճակատի գծում, ներկայացված են երկուշաբթի կայանալիք միջոցառմանը», — հայտարարել է գերատեսչության ղեկավար Ջոն Հիլին:
