Դպրոցների, մանկապարտեզների կառուցում, վերակառուցում, մենք լավագույն դեպքում ունենք 40-42%-անոց կատարում, և սա մի քանի տարիների պատկերն է, արդյո՞ք կառավարությունը համապատասխան վերլուծություն կատարել է, թե՝ ոչ՝ հասկանալու, վերլուծելու պատճառները: Այս մասին ԱԺ մշտական հանձնաժողովների համատեղ նիստում 2024 թ-ի ԿԳՄՍՆ բյուջեի կատարողականի քննարկման ժամանակ ասաց «Հայաստան» խմբակցության պատգամավոր Լիլիթ Գալստյանը՝ դիմելով ֆինանսների նախարար Վահե Հովհաննիսյանին:
«Մենք ամեն անգամ բախվում ենք կառավարության այդ 500 մանկապարտեզ և 300 դպրոցների կառուցման խոստումին, որն այդպես էլ չի կատարվում: Հաշվետու հնգամյակում 40 դպրոցի ավարտուն պատկերի մասին կարող ենք խոսել, ապա այդ 300-500 դպրոց-մանկապարտեզի կառուցման խոստման վերաբերյալ բարձրաձայնումն ունի մեկ մեկնակետ՝ չլինել պոպուլիստ, չհայտարարել թվեր, պատկերներ, որոնք երբևէ կատարման ենթակա չեն և արդեն խրոնիկապես մենք ունենք այդ 40, 30, 40%-անոց կատարողականը»,- ասաց պատգամավորը:
