Նախագիծը, բնականաբար, հետ չեմ քաշելու, քանի որ այն տևական ժամանակ քննարկվել է և ստացել է կառավարության կողմ դիրքորոշումը և վարչապետի ստորագրությամբ, կառավարության առաջարկներով, դրական եզրակացություններով նախագիծը եկել է Ազգային ժողով: Այս մասին ԱԺ պաշտպանության և անվտանգության մշտական հանձնաժողովի նիստին ԱԺ պաշտպանության և անվտանգության հարցերի մշտական հանձնաժողովում «Բանակից գումարի դիմաց ազատման» անունը ստացած նախագծի քննարկման ժամանակ ասաց նախագծի հեղինակ և հիմնական զեկուցող ՔՊ-ական պատգամավոր Հայկ Սարգսյանը:
«Ես, որպես քաղաքական թիմի անդամ, պարտավոր եմ կողմ քվեարկելու, եթե այլ կարծիք չեմ հայտնել սահմանված կարգով։ Ուզում եմ նշել, որ առաջին օրվանից, երբ նախագիծը քննարկվել է, պարոն Քոչարյանն ինձ աջակցել է նախագծի քննարկումների ժամանակ: Միշտ ասել է, որ կողմ է նախագծին: Նաև նոյեմբերին, երբ վարչապետի մոտ եղել է քննարկում, որևէ դեմ կարծիք չի հայտնել, մի քանի նախադասությունում միտք է ասել, որոնք ավելի շատ պաշտպանել են նախագիծը, առնվազն որևէ բացասական միտք չի ասել, ինչը նշանակում է, որ պարոն Քոչարյանը եղել է կողմ»,- ասաց նա։
Սարգսյանն ասաց, որ նախագիծը մարտից ինտենսիվ քննարկել են հանձնաժողովում, որպեսզի մինչև ամառային զորակոչը հասցնենք ընդունել:
Սարգսյանի ելույթն ընդհատեց հանձնաժողովի նախագահ Անդրանի Քոչարյանը: Նա բարկացած հարցրեց. «Պար՛ոն Սարգսյան, ո՞ր հանձնաժողովում, կարո՞ք եք նշել, հանձնաժողովի անդամներն այստեղ են: «Պարո՛ն Քոչարյան, ասացի՝ չընդհատեք: Ես կհրապարակեմ Ձեր գրած մեյլը և նաև աշխատանքային քննարկման հրավերները, կհրապարակեմ հեսա հաջորդիվ»,- ի պատասխան ասաց Սարգսյանը:
Քոչարյանն էլ պնդեց՝ հենց հիմա հրապարակեք:
Աղմկահարույց նախագիծը հանձնաժողովի բացասական եզրակացությունը ստացավ, իսկ Հայկ Սարգսյանը լքեց դահլիճը:
