Այդ հայտարարությունը եկեղեցու մասին չէր, ՀՀ մասին էր և փորձ էր արվում տպավորություն ստեղծել, որ ՀՀ-ում կարող են ինչ-որ մարդիկ գալ ինչ-որ տեղերից և ինչպես իրենք են ասում՝ իրենց ձևերով ինչ-որ բան անել, ՀՀ-ն ունի արձագանքի կոնկրետը լծակներ, և ես չեմ հանդուրժի՝ եթե որևէ մեկի լեզուն պտտվի նման բան ասի:
Այս մասին ԱԺ-ում լրագրողների հետ զրույցում ասաց ՀՀ վարչապետ Նիկոլ Փաշինյանը՝ Անդրադառնալով գործարար Սամվել Կարապետյանի շուրջ ստեղծված իրավիճակին:
«Ես ընդհանրապես խորհուրդ եմ տալիս, որ որևէ մեկի լեզուն չպտտվի նման բան ասի: ՀՀ-ն ժողովրդավարական երկիր է և ՀՀ-ում յուրաքանչյուրն ունի կարծիք հայտնելու, հավաքներ անցկացնելու, քաղաքական և հանրային կյանքին մասնակցելու իրավունք, բայց ՀՀ-ին սպառնալ որևէ մեկը չի կարող, որքան էլ ժողովրդավարություն է, ես ամենակոշտ ու ամենակոպիտ միջոցները կձեռնարկեմ ցանկացած նման դեպքում»,- ասաց Փաշինյանը:
Դիտարկմանը՝ եթե որևէ մեկը կանգնում է եկեղեցու կողքին, պետք է կալանավորե՞ք , նա ասաց.
«Ոչ, Կարապետյանն ասաց, որ եթե քաղաքական գործիչներին չհաջողվի, մենք մեր ձևերով կմասնակցենք կամ կմիջամտենք և այլն, դա արժանացել է և արժանանալու է կոնկրետ գնահատականի:
Մեր երկրում շատերը ժողովրդավարությունը փորձում են նույնացնել թուլություն հետ: Ես ասում եմ՝ նրանք, ովքեր կփորձեն ժողովրդավարությունը թուլության հետ շփոթել, պետության համը կմնա նրանց բերաններում»:
Դիտարկմանը, թե Կարապետյանը չի ասել՝ կմիջամտենք, նա ասաց.
«Նրանք ովքեր կփորձեն ասել՝ մենք մեր ձևերով կմասնակցենք, այո՛, արժանանալու են սրան»:
Փաշինյանը շեշտեց, որ նրա այդ հայտարարությունը կապ չունի ո՛չ եկեղեցու, ո՛չ եկեղեցու շահերի հետ:
«Ես ուղիղ մեկ ամիս առաջ տվել էի կառավարության անդամներին հանձնարարական, որ ՀԷՑ-ի կողմից ժողովրդին հասցված վնասը պետք է վերականգնվի: Իմ մարզային այցերի ժամանակ հասկացա, որ ՀԷՑ-ը ՀՀ-ում էներգետիկ ճգնաժամ է ստեղծել, հիմա վերլուծությունը հիմք է տալիս մտածելու, որ դա արվել է ՀՀ-ում ներքին հանրային դժգոհություն գեներացնելու համար:
Բայց ես տվել էի հանձնարարական, որ մեկ ամսվա ընթացքում կամ պետք է հստակ ժողովրդին հասցված վնասը վերակագնելու մեխանիզմներ դրվեն, կամ ՀԷՑ-ը պետք է պետականացվի: Իմ հանձնարաարականի օրը լրանում է հունիսի 21-ին, և ես այդ ակտիվացումն ուղիղ կապում եմ իմ հանձնարարականի հետ: Եկեղեցին տվյալ դեպքում ՀԷՑ-ի՝ շուտով նախկին սեփականատերերի համար ընդամենը ծխածածկույթ է»,- շեշտեց նա:
