Շարունակվում է Արագածոտնի թեմի առաջնորդ Գերաշնորհ Տեր Մկրտիչ եպիսկոպոս Պռոշյանի և Արագածոտնի թեմի դիվանապետ, Մուղնիի Սուրբ Գևորգ եկեղեցու հոգևոր հովիվ Տեր Գարեգին քահանա Արսենյանի գործով առաջին դատական նիստը։
Դատարան են եկել թեմի հոգևորականներն՝ ի աջակցություն Սրբազան Հորը։
Դատական նիստերի դահլիճ են եկել նաև Ստեփան Ասատրյանն ու Արամայիս Թախմազյանը՝ նախկին հոգևորականներ Տեր Արամն ու Տեր Թադեն, նրանք տուժող կողմն են։
Դատախազը միջնորդեց ևս երեք ամիս ժամկետով երկարաձգել Մկրտիչ Սրբազանի կալանքի ժամկետը։
Մկրտիչ Սրբազանի փաստաբան Ռոման Ահարոնյանը հայտարարեց, որ լուրջ չէ մտածել, թե տուժողների՝ Ստեփան Ասատրյանի ու Արամայիս Թախմազյանի վրա Սրբազանը կարող է ազդեցություն գործել։
«Հանրահայտ փաստ է՝ տուժողները վայելում են երկրի քաղաքական բարձրագույն իշխանության հովանավորությունը, անգամ կարգալույծ լինելուց հետո, շարունակում են հակաեկեղեցական վարք դրսևորել, ու հանկարծ ասում եք՝ Սրբազանին կալանավորենք, որ հանկարծ չազդի տուժողի վրա, իսկապե՞ս»,- նշեց փաստաբանը։
Ահարոնյանը նշեց, որ այս պահին որևէ խափանման միջոցի հիմք չկա ու կալանքն անհապաղ ենթակա է վերացման։
