Ունենք Առողջապահության նախարարության թեժ գիծ՝ 8003, և Առողջության ապահովագրության հիմնադրամի զանգերի կենտրոն՝ 8866: Առողջապահության նախարարության թեժ գիծը 24-ժամյա ռեժիմով է աշխատում, իսկ զանգերի կենտրոնը՝ մինչև ժամը 20:00-ը: Շնորհակալ ենք քաղաքացիներից, որ ակտիվ զանգում են, ներկայացնում առաջարկություններ և բողոքներ: Այս մասին Ազգային ժողովում, Առողջության ապահովագրության համակարգի խնդիրների քննարկման ժամանակ ասել է ԱՆ նախարար Անահիտ Ավանեսյանը:
Նա նշել է, որ համակարգի գործարկման առաջին երկու շաբաթներին, ամեն օր մոտ 5,000 զանգ են սպասարկել, հիմա թվերը նվազում են, բայց նախարարության համար այդ հետադարձ կապը կարևոր է:
«Մյուս շաբաթվանից բժշկական կենտրոններում փակցված կլինեն QR կոդեր, որոնք սկանավորելով Ձեր մոտ կբացվի շատ կարճ հարցաշար՝ կոնկրետ հարցերով, և այնտեղ կարող եք անանուն լրացնել Ձեր դիտարկումները:
Դա մեզ հնարավորություն կտա մեր քաղաքացիների գոհունակությունը չափել, հասկանալ խնդիրները: Բողոքը պետք է այնպիսին լինի, որից կարողանանք ինչ-որ բան քաղել, որ տեսնենք՝ ինչում է եղել խնդիրը. սպասել են, բարեհամբույր չեն եղել, վճար են գանձել և թե այլ դեպք»,-մանրամասնել է Ավանեսյանը:
