Սամվել Կարապետյանը Արցախում ամենաշատ ներդրումներ կատարած մարդն է: Այս մասին իր սոցիալական էջում ասել է «Ուժեղ Հայաստան» կուսակցության անդամ Ռուբեն Վելիցյանը:
«Մի հարց տամ, եթե դուք ունենայիք միլիոնավոր դոլարներ, արդյո՞ք ներդրում կանեիք միջազգային ճանաչում չունեցող երկրում։ Միջազգայնորեն չճանաչված Արցախում 25 միլիոն դոլար ներդրմամբ կառուցված հիվանդանոցը կառուցել է Սամվել Կարապետյանը։ Նա կառուցել է հիվանդանոց, որը պատրաստ էր դիմագրավել ցանկացած տեսակ հարձակման, որը կպաշտպաներ մեր հայրենակիցների կյանքը, առողջությունը, հնարավորություն կտար առաջին օգնության: Սա միակ ներդրումը չէ, որ Սամվել Կարապետյանը արել է Արցախում, նա արել է ներդրումներ այն ժամանակ, երբ ոչ մեկ չէր համաձայնվում Արցախում ներդրում անել, իսկ ինքը շարունակում էր գումարներ ծախսել։ Հիվանդանոցից բացի արդիականացրել է նաև էլեկտրական ցանցերը։
Ինչի՞ համար, որովհետև լավ հասկանում էր, որ Աստված մի արասցե, եթե մի օր հարձակում լինի Արցախի վրա, ապա թշնամին առաջին հերթին կհոսանքազրկի Արցախը: Անգամ պատերազմի ավարտից հետո՝ բլոկադայի ժամանակ, Սամվել Կարապետյանը շարունակում էր Արցախում գումար ծախսել, վերանորոգում էր բոլոր այն ենթակայանները, որտեղ հարձակման էր ենթարկվել Արցախը: Այս ամենը խոսում է այն մասին, որ Սամվել Կարապետյանը մեծ հայրենասեր է, ով առանց մեկ վայրկյան մտածել միակ մարդն էր, ով Արցախում գումար էր ծախսում, որ ունենանք ուժեղ Արցախ, բայց ապիկար կառավարման պատճառով մենք այն կորցրեցինք: Մենք չենք ցանկանում կորցնել նաև Հայաստանը, այդ իսկ պատճառով ժամանակն է այն փոփոխությունների, որոնք թույլ կտան ունենալ կայուն և երկարաժամկետ խաղաղությամբ Հայաստան»,- նշել է նա:
