Նիդերլանդների Նեյմեգեն քաղաքի Ռադբաուդ համալսարանի բժշկական կենտրոնի տասներկու աշխատակիցներ վեցշաբաթյա կարանտինի մեջ են հայտնվել՝ հանտավիրուսով վարակված պացիենտի հետ շփման ժամանակ անվտանգության միջոցառումների խախտման պատճառով։ Այս մասին հայտնել է Hart van Nederland պորտալը, հաղորդում է ՏԱՍՍ-ը:
Ըստ տեղեկության՝ հիվանդանոցում խոստովանել են, որ պացիենտի բուժման ժամանակ անվտանգության գործող արձանագրությունները լիարժեքորեն չեն պահպանվել։
«Չնայած վարակվելու հավանականությունը չափազանց փոքր է, անվտանգության միջոցառումների պահպանումը չափազանց կարևոր է բուժման գործընթացում ներգրավված բոլոր անձանց համար։ Մենք ցավում ենք, որ դա տեղի է ունեցել մեր համալսարանական բժշկական կենտրոնում»,- լրագրողներին հայտարարել է կլինիկայի վարչության նախագահ Բերտին Լահյոյսը։
Ինչպես հստակեցնում է պորտալը, պացիենտից անալիզի համար վերցված արյունը վիրուսի բնույթի պատճառով պետք է մշակվեր ավելի խիստ ընթացակարգով։ Բացի այդ, հիվանդանոցից հայտնել են, որ պացիենտի կենսանյութերի ուտիլիզացումն իրականացվել է ոչ համապատասխան արդի միջազգային հրահանգների։
Մայիսի 7-ին Ռադբաուդ համալսարանի բժշկական կենտրոնը հայտնել էր, որ MV Hondius լայներից տարհանված պացիենտներից մեկի հանտավիրուսի թեստը դրական արդյունք է տվել։ Պացիենտը տեղեկացվել է այդ մասին, նա համապատասխան բուժում է անցնում հիվանդանոցի բաժանմունքներից մեկում։
Մայիսի 11-ի երեկոյան MV Hondius լայները, որի վրա տեղի էր ունեցել հանտավիրուսի բռնկումը, Կանարյան կղզիների Տեներիֆե նավահանգստից մեկնել է Նիդերլանդներ։ Ընդհանուր առմամբ նավում հանտավիրուս է հայտնաբերվել ութ մարդու մոտ։ Երեք ուղևոր մահացել է, մեկ հիվանդ գտնվում է ծայրահեղ ծանր վիճակում։
Վարակի հետագա տարածումը կանխելու համար ուղևորներին հրահանգվել էր մնալ նավախցիկներում, սակայն հանտավիրուսի ինկուբացիոն շրջանը կարող է տևել մի քանի շաբաթ, ինչը դժվարացնում է նոր դեպքերի օպերատիվ հայտնաբերումը։
Ապրիլին Նիդերլանդների դրոշի ներքո նավարկող լայները դուրս էր եկել Արգենտինայի Ուշուայա քաղաքից և ուղևորվել դեպի կրուիզի վերջնակետ՝ Կանարյան կղզիներ։ Նավում եղել է շուրջ 150 մարդ, հիմնականում՝ Մեծ Բրիտանիայի, Իսպանիայի, Նիդերլանդների և ԱՄՆ-ի քաղաքացիներ։
Հանտավիրուսը վիրուսների ընտանիք է, որը ախտահարում է հիմնականում մանր կաթնասուններին, սակայն կարող է փոխանցվել նաև մարդուն: Ծանր դեպքերում ախտահարվում են վարակվածների թոքերը, նրանց մոտ զարգանում է սրտային անբավարարություն և հեմոռագիկ տենդ:
