ՀՀ ազգային անվտանգության ծառայությունը, խախտելով տեղեկատվություն ստանալու՝ օրենքով նախատեսված հնգօրյա ժամկետը (կայքից լրացուցիչ ժամանակ չեն խնդրել), 18 օր անց պատասխանել է սահմանային անցակետում ՀՀ երկրորդ նախագահ Ռոբերտ Քոչարյանին վերագրվող կադրերի արտահոսքի օրինականության մասին NEWS.am-ի գրավոր հարցմանը:
Հիշեցնենք, որ հունիսի 14-ին զանգվածային լրատվության միջոցներով և համացանցում տեղեկատվություն ու տեսանյութ տարածվեց այն մասին, որ «Զվարթնոց» միջազգային օդանավակայանի սահմանային անցման կետում ՀՀ երկրորդ նախագահ Ռոբերտ Քոչարյանի փաստաթղթերը ստուգվում են ՀՀ ԱԱԾ սահմանապահ զորքերի ծառայողների կողմից, և վերջինիս թույլ չի տրվել լքել ՀՀ տարածքը: Տարածված տեսանյութում հստակ երևում են օդանավակայանի սահմանային հսկողության անցման կետի տեսախցիկների տեսագրությունը և երկրորդ նախագահի անձնական տվյալների ստուգման գործընթացը։
Հաշվի առնելով, որ ՀՀ պետական սահմանի «Զվարթնոց» անցման կետում հսկողությունն իրականացնում են ՀՀ ԱԱԾ սահմանապահ զորքերը, նույն օրը NEWS.am-ը գրավոր հարցմամբ դիմել էր ԱԱԾ-ին՝ խնդրելով օրենքով սահմանված ժամկետում տրամադրել տեղեկատվություն հետևյալ հարցերի վերաբերյալ.
1. Արդյո՞ք ՀՀ ԱԱԾ-ում հարուցվել է ծառայողական քննություն՝ պարզելու, թե ինչպես են «Զվարթնոց» օդանավակայանի անցման կետի տեսանկարահանող սարքերի տեսագրությունները (որոնք պարունակում են անձնական տվյալներ) հայտնվել լրատվամիջոցների և երրորդ անձանց տրամադրության տակ: Եթե այո, ապա ի՞նչ փուլում է այն գտնվում, կամ ի՞նչ է պարզվել:
2. Տվյալ տեսանյութի հրապարակման և տեղեկատվության արտահոսքի համար պատասխանատու անձանց նկատմամբ արդյո՞ք կիրառվել են կարգապահական պատասխանատվության միջոցներ:
3. Ի՞նչ քայլեր են ձեռնարկվում ՀՀ ԱԱԾ սահմանապահ զորքերի կողմից՝ հետագայում սահմանային անցման կետերում քաղաքացիների անձնական տվյալների և տեսահսկման համակարգերի տվյալների անվտանգությունն ու գաղտնիությունն ապահովելու ուղղությամբ:
Մեր կողմից նախանշված հստակ հարցերին պատասխանելու փոխարեն, ԱԱԾ-ն պարզապես հղում է կատարել «Ազգային անվտանգության մարմինների մասին» օրենքի 15-րդ հոդվածին, որտեղ սահմանված են Ազգային անվտանգության մարմինների լիազորությունները և պատվիրակված գործառույթների իրականացումը: ԱԱԾ-ից, սակայն, չեն հստակեցրել, թե հոդվածում ամրագրված 66 կետերից ո՞րն է համապատասխանում տվյալ օրը ԱԱԾ-ի կողմից իրականացված գործառույթներին:
Եթե խոսքը վերաբերում է, օրինակ, օպերատիվ-հետախուզական նպատակներով իրականացված տեսագրմանը, ապա պատասխանում առնվազն պետք է հղում կատարվեր անձի՝ հնարավոր գտնվելու այլ վայրերում «ներքին դիտում» օպերատիվ-հետախուզական միջոցառում իրականացնելու թույլտվություն ստանալու մասին դատարանի որոշմանը: Փոխարենը՝ ԱԱԾ-ի կողմից վկայակոչված «Ազգային անվտանգության մարմինների մասին» օրենքի 7-րդ հոդվածում հստակ ամրագրված է, որ Ազգային անվտանգության մարմինների գործունեության ընթացքում ստացված՝ անձի անձնական և ընտանեկան կյանքի մասին տեղեկությունները ազգային անվտանգության մարմինները, առանց քաղաքացու համաձայնության, իրավունք չունեն հավաքել, պահել, օգտագործել կամ տարածել:
Ամենաուշագրավը, թերևս, ԱԱԾ-ի կողմից տրամադրված պաշտոնական գրության մեջ տեղ գտած հետևյալ ձևակերպումն է:
«Միաժամանակ, ՀՀ ազգային անվտանգության ծառայությունն իրավասու է որևէ նպատակով հրապարակել իր կողմից տնօրինվող տեղեկատվությունը»,- ասված է ԱԱԾ-ի պատասխանում՝ առանց հստակեցնելու, թե կոնկրետ ի՞նչ նպատակով:
Այս պատասխանով ԱԱԾ-ն, ըստ էության, դե յուրե կրկնել է ՀՀ վարչապետ Նիկոլ Փաշինյանի՝ դեռևս հունիսի 18-ին արված հակասահմանադրական և հակաօրինակ որակված այն պարզաբանումը, թե «ԱԱԾ-ն ինչ կուզի կհրապարակի»:
