«Ինչ արել եմ, արել եմ լավ, արել եմ քիչ ու էլի եմ անելու»․ Նարեկ Մալյանի գործով դատական նիստը նշանակվեց հունիսի 30-ին
Հիմա շատ կարճ կասեմ՝ ինչ արել եմ, խոսքը մասնավորապես «Չաուշեսկուների» ներկայացման մասին է, արել եմ լավ, արել եմ քիչ ու էլի եմ անելու։
Այս մասին Ավան-Նոր Նորք առաջին ատյանի դատարանում «Չաուշեսկուների գործ» անվանումը ստացած դատական նիստում հայտարարեց մեղադրյալ Նարեկ Մալյանը։
Հիշեցնենք, որ 2021թ-ի փետրվարի 26-ին Ազգային ժողովի դիմաց հասարակական գործիչ Նարեկ Մալյանը բեմադրել էր «Չաուշեսկուի գնդակահարությունը կամ մահ դավաճաններին» ֆուտուրիստական ներկայացման ցուցադրությունը: Ինչից հետո Նարեկ Մալյանին մեղադրանք է առաջադրվել ՀՀ քրեական օրենսգրքի 226.2 հոդվածով (Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը):
Այս գործով երեկ՝ մայիսի 26-ին, ավարտվեց գործով վիճաբանությունների փուլը։ Դատական նիստը հետաձգվեց, հաջորդ դատական նիստը նշանակվեց հունիսի 30-ին։
