Երևանի քաղաքապետարանի գործակարգավարական այսօրվա նիստում քաղաքապետ Տիգրան Ավինյանը հայտարարեց, որ նախորդ շաբաթվա ընթացքում Երևանին է վերադարձվել «Կասկադ» համալիրի վերին հատվածը՝ 11,5 հա տարածքով:
«Ուզում եմ հիշեցնել, որ տարածքի շինարարությունը դեռևս խորհրդային տարիներից անավարտ էր մնացել: Երևանի քաղաքապետարանը «Կասկադ»-ի ընդհանուր բարեկարգման և կառուցապատման համատեքստում առաջիկայում այս հատվածում ևս լայնածավալ ծրագիր կիրականացնի, որի արդյունքում «Կասկադ» համալիրը երևանցիներին և քաղաքի հյուրերին կներկայանա ամբողջական և ավարտուն տեսքով»,- հավելեց Ավինյանը:
Նա ընդգծեց, որ նախնական քննարկումից հետո պետք է ունենան «Կասկադ»-ի հետագա կառուցապատման ամբողջական ծրագիրը։
Տիգրան Ավինյանը նաև ասաց, որ մայրաքաղաքին է վերադարձվել նաև «Կանազ» մշակութային և սպորտային համալիրը՝ շեշտելով, որ համայնքային ծրագրով մարզամշակութային կառույցը հիմնովին կվերանորոգվի:
