Առուշ Առուշանյանը շարունակում է պաշտոնավարել որպես համայնքի ղեկավար, քանի որ պաշտոնավարումը դադարեցնելու որոշումն ընտրովի պաշտոնների համար չի կարող կիրառվել։ Այս մասին NewDay.am-ը տեղեկացավ Գորիսի քաղաքապետ Առուշ Առուշանյանից։ Նա ընդգծեց, որ մանրամասները կարող է ներկայացնել փաստաբանը։
Առուշ Առուշանյանի պաշտպան Արմեն Մելքոնյանն էլ ասաց, որ օրենքը չի կարող ընտրողաբար կիրառվել։
«Առկա է օրենսդրական բաց, Առուշ Առուշանյանից առաջ 3 համայնքապետի նկատմամբ նման որոշում կայացվել է՝ լրացուցիչ պատիժ է նշանակվել, սակայն որևէ մեկի նկատմամբ չեն կարողացել կիրառել։ Հիմա չեն կարող մեկի նկատմամբ կիրառել, մյուսների նկատմամբ՝ ոչ»,-շեշտեց պաշտպանը։ Ըստ նրա՝ ավագանուն Պրոբացիոն ծառայությունը գրություն է ուղարկել Առուշանյանի պաշտոնը դադարեցնելու վերաբերյալ, սակայն ՀՀ Սահմանադրությամբ ավագանին նման լիազորություն չունի և չի կարող հակասահմանադրական գործողություններ անել, դատարանի որոշումը կատարման առումով անհնար է օրենքի դաշտում, պատժատեսակը սահմանված չէ ընտրված քաղաքապետին պաշտոնանկ անելու համար։
Հիշեցնենք, որ 2021թ-ի Հոկտեմբերի 17-ին Գորիսում կայացած ավագանու ընտրություններում Առուշ Առուշանյանի գլխավորած «Առուշ Առուշանյան դաշինքը»-ը 60,3 տոկոս ձայով հաղթել էր։ Նա այդ ժամանակ գտնվում էր կալանավայրում։ Նրա դեմ իշխանությունները օգտագործում էին վարչական, ուժային, դատական ողջ արսենալը, սակայն Գորիսի բնակիչները ճնշումներին չէին տրվել և Առուշանյանին ընտրել էին քաղաքապետ։
Անի Գևորգյան
