Լեռնային Ղարաբաղի պաշտպանության բանակի նախկին հրամանատարի առաջին տեղակալ, գեներալ-մայոր Դավիթ Մանուկյանը, ով գերեվարվել էր Հակարիի կամուրջն անցնելիս՝ Ռուբեն Վարդանյանի հետ միասին, այսօր առաջին անգամ ցուցմունք է տվել Բաքվի դատարանում շինծու դատավարության շրջանակներում։
Մանուկյանը հաստատել է, որ մասնակցել է ինչպես Առաջին, այնպես էլ Երկրորդ Արցախյան պատերազմներին։ Նա նաև հայտնել է, որ 44-օրյա պատերազմի ժամանակ իր մեքենային հարվածել է «Բայրաքթար» անօդաչու թռչող սարքը, ինչի հետևանքով վարորդը վիրավորվել է, սակայն ինքը չի տուժել, քանի որ գտնվում էր մեքենայից 20 մետր հեռավորության վրա։ Մանուկյանը նշել է, որ իր մոտ եղած զենքը, որը հետագայում հայտնաբերվել է իր տանը, հաշվառված է եղել Հայաստանի ոստիկանությունում։
Հիշեցնենք, որ ավելի վաղ Արցախի ՊԲ նախկին հրամանատար Լևոն Մնացականյանը նույնպես Բաքվի դատարանում հաստատել էր իր մասնակցությունն Արցախի ազատագրական պայքարին՝ ընդգծելով, որ որտեղ էլ չմասնակցեր, անհրաժեշտության դեպքում կմասնակցեր։
Դավիթ Մանուկյանը ինքն էր որոշել ուղեկցել նախկին պետնախարար Ռուբեն Վարդանյանին՝ համարելով, որ Հակարիի կամուրջը միայնակ անցնելու դեպքում Վարդանյանի ձերբակալության ռիսկերը մեծ են։ Մանուկյանը անձամբ վարել է նրան տեղափոխող մեքենան, վտանգել սեփական կյանքը և արդյունքում ինքն էլ հայտնվել գերության մեջ։ Ադրբեջանցիները նաև մի քանի ժամ պահել են Մանուկյանի կնոջը, ապա թույլ տվել նրան մենակ հատել սահմանն ու գալ Հայաստան։
