Պարոն Վարդանյանի ուղերձում մի քանի շատ կարևոր շեշտադրումներ կար, մասնավորապես գտնվելով Բաքվի բանտում, կոչ է անում չհուսալքվել. այս մասին լրագրողների հետ զրույցում ասաց «Ապրելու երկիր» կուսակցության համահիմնադիր Մեսրոպ Առաքելյանը՝ անդրադառնալով Բաքվի մեկուսարանից ընտանիքի միջոցով Ռուբեն Վարդանյանի տարածած ուղերձին:
«Ծանր էր լսել Ռուբեն Վարդանյանի ուղերձը մեկուկես տարի անց, ու կարծում եմ՝ այն, ինչ Ռուբեն Վարդանյանը փոխանցեց, լսելու և սովորելու մեծ բան կա, որովհետև պարոն Վարդանյանի ուղերձում մի քանի շատ կարևոր շեշտադրումներ կար: Մասնավորապես, գտնվելով Բաքվի բանտում, կոչ է անում չհուսալքվել, որովհետև դա համարում է ամենածանր մեղքը մարդու համար, որովհետև ցանկացած պարագայում պետք է պայքարել»,- ասաց նա:
Առաքելյանը հույս հայտնեց, որ լսելով Ռուբեն Վարդանյանի պայքարի կոչը Բաքվի բանտից, մեր հասարակությունը կարթանա այն իրավիճակից, ինչ որ կա:
«Պարոն Վարդանյանը համոզված է, որ ամեն ինչ լավ է լինելու, որովհետև միայն պայքարի ճանապարհով ենք հնարավորություն ունենալու հաղթահարել այս մարտահրավերները։ Հուսամ՝ իշխանություններն էլ մի քանի անգամ կլսեն Ռուբեն Վարդանյանի ուղերձը: Ինձ ու հասարակության ճնշող մեծամասնության համար պարզ է, թե ով է Ռուբեն Վարդանյանը, այնպես չէ, որ այս ուղերձով պետք է ճանաչենք, բայց մի շարք ստահակներ հուսով եմ այս ուղերձից հետո կվերաիմաստավորեն իրենց մտքերը, իրենց գաղափարները, թե ինչ մեղադրանքներ ու ինչ վարքագիծ էին դրսևորում պարոն Վարդանյանի նկատմամբ: Նույնիսկ Բաքվի բանտում գտնվելով Ռուբեն Վարդանյանի ուժը, պատրաստակամությունը պայքարելու հայրենիքի, մեր ժողովրդի համար շատ կարևոր է ու հասարակության մոտ վստահ եմ այսուհետ հայրենիքի նկատմամբ նվիրումը և սերը բացի խոսքերից, նաև գործողության կմղի»,- նշեց նա:
Անդրադառնալով նրան, որ Վարդանյանը չի դադարեցնելու հացադուլն Առաքելյանն ասաց, որ պարոն Վարդանյանը նաև նշել է, որ ուժեղ է, տոկուն է: «Մենք չենք կասկածել, որ իր որոշումը ոչ թե ինչ-որ այս իրավիճակի հետ է, այլ սա բողոք է, բողոքի ձայն է՝ ուղղված միջազգային հանրությանը, բողոքի ձայն է նաև, որ այս իրավիճակից դուրս գա հասարակությունը: Վստահ եմ, որ պարոն Վարդանյանն ինչպես իր բոլոր որոշումներում հիմնավոր գիտակից հիմքեր է դնում, հացադուլից դուրս գալու որոշումն էլ կկայացնի: Իր առողջությունը և կյանքը պետք է հայրենիքին, հետևաբար, հուսով եմ՝ առաջիկա օրերին հացադուլը դադարեցնելով՝ սրանով նաև կստիպի իր փոխարեն, որ Հայաստանում շարունակեն պայքարը այս ամենի համար»,- նշեց նա:
