Սիրիայի անցումային ժամանակահատվածի նախագահ Ահմեդ ալ Շարաան ժամանել է Ֆրանսիա: Ինքնաթիռը վայրէջք է կատարել Շառլ դը Գոլի անվան օդանավակայանում: Սա նրա առաջին պաշտոնական այցն է Եվրոպա։
Ավելի վաղ հաղորդվել էր, որ նախագահ Էմանուել Մակրոնի հետ հանդիպումը կայանալու է չորեքշաբթի: Մակրոնը «կրկնելու է Ֆրանսիայի աջակցությունը նոր Սիրիայի կառուցմանը, ազատ, կայուն, ինքնիշխան Սիրիային, որը հարգում է սիրիական հասարակության բոլոր բաղադրիչները», երեքշաբթի հայտարարել է Ելիսեյան պալատը:
«Այս հանդիպումը Ֆրանսիայի պատմական հանձնառության մի մասն է սիրիացի ժողովրդին, որը ձգտում է խաղաղության և ժողովրդավարության», — նշված է հաղորդագրությունում:
Հանդիպման ընթացքում Մակրոնը կընդգծի իր պահանջները սիրիական կառավարությանը, առաջին հերթին տարածաշրջանի կայունացման, այդ թվում՝ Լիբանանի և ահաբեկչության դեմ պայքարի մասին։
Նշենք, որ Սիրիայի նոր ղեկավարն իր առաջին արտասահմանյան այցը կատարել է Թուրքիա:
