ՊԵԿ նախկին նախագահ Վարդան Հարությունյանին կալանավորելու որոշման դեմ բողոքը կքննի Վերաքննիչ հակակոռուպցիոն դատարանի դատավոր Կարեն Ամիրյանը։ Այս մասին «Փաստինֆո»-ի հետ զրույցում հայտնեց փաստաբանական խմբի անդամ Արմեն Անդրիկյանը։
Հիշեցնենք, որ օգոստոսի 8-ին կալանավորվել է ՊԵԿ նախկին նախագահ Վարդան Հարությունյանը։ Նրան իրավապահները մեղադրում են ձեռնարկատիրական գործունեությանն ապօրինի մասնակցելու, հակամրցակցային գործունեության և փողերի լվացմանմեջ, մինչդեռ, մեղադրանքի հիմքում դրված հանգամանքներով քննություն արդեն իրականացվել է դեռևս յոթ տարի առաջ և հերքվել։ Մասնավորապես, քրեական գործը վերաբերում է «Նորֆոլկ Քոնսալթինգ» ընկերության հետ, սակայն այս ընկերության հետ առնչության վերաբերյալ քրեական գործով 2018թ․ քննություն է իրականացվել և վարույթը կարճվել էր։ Ստացվում է՝ յոթ տարի անց իրավապահները որոշել են նույն կարճված գործի տվյալներով առանձին քրեական գործ հարուցել և հետապնդում իրականացնել։
Վարդան Հարությունյանին կալանավորելու որոշման դեմ բողոք է ներկայացվել, որով պաշտպանության կողմը վիճարկել է թե՛ հիմնավոր կասկածի, թե՛ կալանավորման հիմքերի առկայության հարցը։
«Հիմնավոր կասկածի մասով նշել ենք, որ մեղադրանքներում ներառված բոլոր հանցակազմերի մասով արդեն 2018 թվականին քննություն իրականացվել է և գործի վարույթը կարճվել է»,- հայտնեց փաստաբանը։
Ինչ վերաբերում է կալանքի հիմքերին, ապա պաշտպանության կողմն արձանագրել է, որ դատարանի որոշումը հիմնավորված և փաստարկված չէ և որևէ հիմք առկա չէ, որ Վարդան Հարությունյանը կարող է խոչընդոտել քննությանը։
