Եվրոպայում գազի բորսայականգները հունվարի 5-ին ավելի քան մեկ տարվա ընթացքում առաջին անգամ իջել են հազար խորանարդ մետրի դիմաց 700 դոլարից՝ կորցնելով մոտ 2 տոկոս: Տեղեկությունը հայտնում է «Փրայմը»՝ հղում անելով Լոնդոնի ICE բորսայի տվյալներին։
TTF-ում (Եվրոպայում խոշորագույն հանգույց, որը գտնվում է Նիդեռլանդներում) փետրվարյան ֆյուչերսները նվազել են 2,3 տոկոսով` հազար խորանարդ մետրի դիմաց 696,4 դոլար։
Մոսկվայի ժամանակով 10:12-ի դրությամբ (Երևանի ժամանակով` 11:12) արժեքը կազմել է 726,3 դոլար (+1,9 տոկոս): Գնանշումների դինամիկան բերված է նախորդ առևտրային օրվա հաշվարկային գնից՝ հազար խմ-ի դիմաց 712,7 դոլար:
Եվրամիության երկրները դեկտեմբերի 19-ին պայմանավորվեցին գազի բորսայական առավելագույն գին սահմանել, որը կազմում է 180 եվրո ՄՎտ-ի համար ու կսկսի գործել փետրվարի 15-ից։ Դա նպատակ ունի զերծ պահել եվրոպական տնային տնտեսություններին և ձեռնարկություններին գազի գների բարձրացումներից: Եվրոպայում էներգակիրների բարձր արժեքը, ինչպես նշում են արևմտյան լրատվամիջոցները, վերջին տասնամյակների ընթացքում ամենաբարձր գնաճին է հանգեցրել։
Եվրոպայում գազի գները զգալիորեն աճել էին դեռ 2021 թվականի գարնանը։ Այն ժամանակ TTF-ի գազի գնանշումները տատանվում էին հազար խմ-ի դիմաց 250-300 դոլարի սահմանում, ամռան վերջին գերազանցեցին 600 դոլարը, իսկ աշնանը՝ արդեն 1000 դոլարը։ 2022 թվականի ձմռանը գները հատեցին 2 հազար դոլարի շեմը, իսկ գարնան սկզբին ռուսական էներգառեսուրսների ներմուծման արգելքի մտավախության պատճառով հասան հազար խմ-ի դիմաց ռեկորդային ցուցանիշի ՝ 3892 դոլարի։
Չնայած ընթացիկ անկմանը` գազի գնանշումներն ավելի քան երկու անգամ գերազանցում են բազմամյա դիտարկումների միջին ցուցանիշները: Նման կայուն բարձր գներ չեն եղել Եվրոպայում գազային կենտրոնների գործունեության ողջ պատմության ընթացքում՝ 1996 թվականից սկսած։
