Վարչապետի որոշմամբ օգոստոսի 10-ին ձևավորված Հայաստանի ազգային ագրարային համալսարանի խորհրդի նոր կազմը շարունակում է տարակուսանք առաջացնել: Ինչպես արդեն գրել էինք, խորհրդի կազմում ուսանողության կողմից ընդգրկվածներից մեկը՝ Թոռնիկ Ալիյանը ոչ ուսանող է, ոչ ասպիրանտ, այլ՝ հայցորդ:
Խորհրդի կազմն ուսումնասիրելիս պարզ դարձավ, որ խորհրդի կազմում ուսանողության կողմից ընտրված Արմեն Օզմանյանը ներկայացված է որպես համալսարանի մագիստրանտ: Սակայն իրականում Օզմանյանը այս տարվա մայիս-հունիս ամիսներին ավարտել է համալսարանի բակալավրիատը, իսկ համալսարանի ընդունող հանձնաժողովի կողմից հուլիսի 3-ին հրապարակված անվճար առկա մագիստրատուրա ընդունվածների շարքում Օզմանյանի անունը չկա (մագիստրատուրայի 2-րդ փուլի ընդունելության փաստաթղթերի հանձնման վերջնաժամկետը սեպտեմբերի 1-ն է, իսկ հեռակայի ընդունելությունը կազմակերպվում է աշնանը):
Վերոնշյալը չի խանգարել համալսարանի ուսանողական խորհրդին հուլիսի 7-ին կայացած նիստում Օզմանյանին ներկայացնել որպես Ագրոբիզնեսի և տնտեսագիտության ֆակուլտետի մագիստրանտ և երաշխավորել որպես հոգաբարձուների խորհրդի անդամի թեկնածու: Սույն փաստը չի խանգարել նաև համալսարանի ռեկտոր Վարդան Ուռուտյանին համապատասխան գրությամբ ոչ ուսանող, և ոչ էլ մագիստրանտ հանդիսացող Օզմանյանին ներկայացնել ԿԳՄՍ նախարար Ժաննա Անդրեասյանին: Իր հերթին նախարարն էլ Օզմանյանի անունը ներկայացրել է կառավարություն և ստրոագրվել է համապատասխան որոշում վարչապետի կողմից:
Հետաքրքիր կլինի իմանալ, արդյոք վարչապետի աշխատակազմի ղեկավար Արայիկ Հարությունյանն ու ԿԳՄՍ նախարար Ժաննա Անդրեասյանը կհարցնեն համալսարանի ռեկտորին՝ ինչու է ոչ ուսանողի, ոչ մագիստրանտի կարգավիճակ ունեցող անձին ներկայացրել որպես մագիստրանտ և հոգաբարձուների խորհրդի անդամության թեկնածու:
