Հանրային ռադիոյի եթերում Հայաստանի վարչապետ Նիկոլ Փաշինյանին հարց ուղղվեց․ «Երրորդ հանրապետությունը ձևավորվել է Անկախության հռչակագրի հիման վրա․ Դուք առաջարկում եք նոր Սահմանադրություն նո՞ր՝ չորրո՞րդ հանրապետության համար»։
«Դա գաղափարներից մեկն է»,- պատասխանեց Փաշինյանը։
Նա միևնույն ժամանակ նշեց, որ իր կառավարությունը ոչ թե փոխում է Սահմանադրությունը, այլ «ժողովրդին առաջարկում է փոխել Սահմանադրությունը»։
Փաշինյանը նաև հայտարարեց, թե ժողովուրդը պետք է որոշի հարցը՝ քվեարկությամբ, իսկ իրենք հանրաքվեն չեն կեղծի։
«Տասնյակ ընտրություններ ենք արել Հայաստանում, թող ցույց տան մի դեպք, երբ մենք մի քվեաթերթիկի հետ կապված՝ հարց ենք բարձրացրել»,- ասաց նա։
Նիկոլ Փաշինյանն, ի դեպ, հստակ չպատասխանեց հարցին, թե Ադրբեջանի ճնշումներո՞վ են արդյոք պայմանավորված Սահմանադրության փոփոխությունները։ Ասաց միայն, որ այդ մասին շատ են խոսում։
Հիշեցնենք՝ այսօր Ադրբեջանի նախագահ Իլհամ Ալիևը հստակ հայտարարել էր՝ խաղաղություն Հայաստանի հետ կլինի այն դեպքում, երբ Հայաստանը փոխի իր Սահմանադրությունը։
