Այսօր Երևանի Կոմիտասի անվան պետական կոնսերվատորիայում փակ հանդիպում է ընթացել դասախոսների և ուսանողների մասնակցությամբ։
Փակ հանդիպումից հետո լրագրողների հետ զրույցում Հայաստանի Հանրապետության ժողովրդական արտիստ Հասմիկ Պապյանը ասաց․
«Նախարարության ներկայացուցիչը չէր սպասում, որ կհանդիպեր այսպիսի հախուռն ելույթների, դիրքորոշման դասախոսների, ուսանողների կողմից։ Բայց վերջնական պատասխան չստացանք»։
Նա արձանագրեց՝ ուրախալի փաստ է, որ երիտասարդներն ամուր կանգնած են իրենց ոտքեր վրա, իրենց սկբունքներին հավատարիմ են։
«Դա շատ կարևոր է, իսկապես։ Չգիտեմ՝ ում մտքով է անցել տեղափոխել Կոնսերվատորիան ակադեմիական քաղաք։ Սա մեր հիշողությունն է, որը չենք կարող ջնջել։ Այս շենք այնպիսի մարդիկ են մտել, դուրս եկել, պետք է հասկանալ շենքի իմաստը, նշանակությունը։ Չի կարելի գրչի մի հարվածով տեղափոխել ուրիշ քաղաք։ Խոսում էին աշխատավարձերը կբարձրանա, ուսանողների քանակը կավելանա։ Անհեթեթ պատճառաբանություններ են»,- ասաց Պապյանը։
Ըստ նրա՝ ուսանողները, դասախոսները կմնան իրենց համոզմանը։
«Նրանք, ովքեր որոշել են ամեն ինչը լցնել մի կաթսայի մեջ, նաև Կոնսերվատորիան, թերևս իրենք կկարողանան մտածել իրենց ծրագրերի հաջորդականության մասին»,- հավելեց նա։
Նշենք, որ ուսանողների, դասախոսների հետ հանդիպմանը եկել էր ՀՀ գիտության կոմիտեի նախագահ Սարգիս Հայոցյանը։
