Վարչապետ Նիկոլ Փաշինյանի աշխատակազմի ղեկավար Արայիկ Հարությունյանի կարծիքով՝ «Տավուշը հանուն հայրենիքի» շարժումը մարում է։
Ճշտող հարցին՝ ինչից է նման եզրահանգման եկել, նա պատասխանեց, որ իր քաղաքական փորձառությամբ տեսնում է, որ շարժումը մարում է, շատ հաճախ է լինում՝ առաջնորդներն իրենք իրենց փակուղի են մտցնում․ դրանից էլ նման եզրակացություն եմ արել։
Արայիկ Հարությունյանը ասաց, որ ցանկացած մարդ, ցանկացած բողոք կարող է իրականացնել, և շարժում առաջնորդել, իսկ քաղաքական ուժերն էլ, որոնք գտնվում են դաշտում, կարող են նման գնահատականներ տալ այդ շարժումներին։
Արդյո՞ք իշխանությունը երկխոսության կգնա և ինչո՞ւ չեն իջնում գերատեսչություններից պատասխանատուներ՝ հարցերին պատասխանելու համար հարցին՝ Հարությունյանն արձագանքեց․
«Հիմա, ով ինչ հարց ունենա պետք է մի քանի տասնյակ կամ մի քանի հարյուր հատ մարդ իր հետևից տանի տվյալ գերատեսչության մոտ և ասի թող ղեկավարը իջնի ինձ այս հարցին պատասխան տա՞։ Դա հարաբերվելու ո՞ճ է, ընդ որում համապատասխան վերաբերմունք է լինում այն շարժումների նկատմամբ, որոնք, ըստ էության, տանում են լարման, տանում են բախումների, և դա մենք տեսանք ԱԳՆ դիմաց։ Եթե այս գործելաոճը չլինի, մենք ցանկացած քաղաքական ուժի հետ հարաբերվում ենք»։
Ըստ Հարությունյանի՝ իրենք ամենևին փողոցում ծավալվող գործընթացներին դեմ չեն։
Նա նշեց, որ իրենց իշխանության օրոք բազմաթիվ քաղաքական գործընթացներ են եղել փողոցում, բայց համապատասխան ինստիտուտները հասարակական կարգի խախտումների դեպքում արձագանքում են և համապատասխան գնահատականներ են տալիս։ Երբ ակցիաները խաղաղ են և հասարակական կարգ չի խախտվում, ոստիկանությունն ամբողջությամբ աջակցում է ակցիան։
