Գազայի հատվածում պաղեստինյան ՀԱՄԱՍ խմբավորման քաղբյուրոյի ղեկավար Յահյա Սինվարի սպանությունից հետո խմբավորումը դեռ նոր ղեկավար չի ընտրել, քննարկումները շարունակվում են, ՌԻԱ «Նովոստի»-ին ասել է քաղբյուրոյի փոխղեկավար Մուսա Աբու Մարզուկը։
Նա նշել է, որ շարժման նոր ղեկավարի անունը պաշտոնապես կհայտարարվի, այլ ոչ թե գաղտնի կպահվի անվտանգության նկատառումներից ելնելով, ինչպես որ ավելի վաղ գրել էին որոշ լրատվամիջոցներ:
Ավելի վաղ BBC-ն, հղում անելով խմբավորման ներկայացուցչին, գրել էր, որ ՀԱՄԱՍ խմբավորումը մտադիր չէ հրապարակել իր նոր առաջնորդի անունը։
Հիշեցնենք, որ Իսրայելը վերջին կես տարում սպանել է ՀԱՄԱՍ-ի ղեկավար Իսմայիլ Հանիեին, ապա՝ նրան հաջորդած Յահյա Սինվարին:
Սինվարի ենթադրյալ իրավահաջորդների թվում են Մուհամեդ Դերվիշան, Խալիլ ալ Հայան, Մուհամեդ Նազալը և Խալեդ Մեշալը:
Նշենք, որ Արևմուտքը Սինվարի սպանությունից հետո հայտարարել է, որ այժմ Մերձավոր Արևելքում հրադադարի համար «նոր հեռանկար» է բացվում:
