Բլոգեր 222Lava-ին հնարավոր է կալանավորեն։ Այդ մասին ահազանգել է բլոգերը՝ տեսանյութով դիմելով իր հետևորդներին։
Հիշեցնենք, որ ՊԵԿ-ն այս բլոգերին 109 մլն դրամով տուգանելու որոշում է կայացրել։ Վարույթն ուղարկվել է Քննչական կոմիտե։
«Դեպքի առթիվ վարույթը նախաձեռնվել է 281-րդ հոդվածի 2-րդ մասով։ Միջնորդություն չի ներկայացվել, խափանման միջոց կալանքի հարց այս պահին չկա»,-Panorama.am-ին հայտնեց ՔԿ մամուլի խոսնակ Կիմա Ավդալյանը։
Նրա փոխանցմամբ, 222Lava անունով հայտնի Էրիկ Շահբազյանն այս պահին որևէ կարգավիճակ չունի։
Քրեական օրենսգրքի 281 հոդվածի 2-րդ մասը սահմանում է.
«Առանց պետական հաշվառման կամ գրանցման ձեռնարկատիրական գործունեություն իրականացնելը կամ առանց հատուկ թույլտվության կամ առանց լիցենզիայի լիցենզավորման ենթակա կամ առանց ծանուցման ենթակա գործունեությամբ զբաղվելու իրավունք ձեռք բերելու ծանուցման ենթակա կամ օրենքով արգելված ձեռնարկատիրական գործունեություն իրականացնելը կամ առանց թույլտվության ընդերքը կամ բնական պաշարներն օգտագործելը, որը խոշոր չափերի գույքային վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին, որն առանձնապես խոշոր չափերի գույքային վնաս է պատճառել պատժվում է ազատության սահմանափակմամբ` մեկից երեք տարի ժամկետով, կամ կարճաժամկետ ազատազրկմամբ` մեկից երկու ամիս ժամկետով, կամ ազատազրկմամբ` երկուսից հինգ տարի ժամկետով»։
