Բելառուսի նախագահ Ալեքսանդր Լուկաշենկոն հայտարարել է, որ պետք չէ ճնշում գործադրել Ուկրաինայի նախագահ Վլադիմիր Զելենսկու նկատմամբ, այլ անհրաժեշտ է համոզել, պայմանավորվել նրա հետ: Այս մասին նա հայտարարել է ամերիկացի բլոգեր Մարիո Նաուֆալի հետ զրույցում։
«Հիմա պետք չէ Զելենսկիի վրա ճնշում գործադրել՝ անկախ նրանից, թե նա ինչպիսին է: Պետք է համոզել, պայմանավորվել նրա հետ, քանի որ Զելենսկիի թիկունքին է ուկրաինական հասարակության մեծ մասը։ Ուստի պետք է պայմանավորվել»,- նշել է Լուկաշենկոն։
Նա ընդգծել է, որ Մինսկը պատրաստ է բանակցություններ կազմակերպել Ռուսաստանի նախագահ Վլադիմիր Պուտինի, ԱՄՆ Դոնալդ Թրամփի և Ուկրաինայի նախագահ Վլադիմիր Զելենսկու միջև։
«Եկեք, կնստենք այստեղ, հանգիստ, առանց աղմուկի, առանց բղավելու, կպայմանավորվեենք։ Ուստի, փոխանցեք Թրամփին. ես այստեղ Պուտինի և Զելենսկու հետ սպասում եմ նրան, մենք կնստենք և հանգիստ համաձայնության կգանք։ Եթե ցանկանում եք համաձայնության գալ»,- նշել է Լուկաշենկոն։
Միաժամանակ նա հրաժարվել է միջնորդի դերից Մոսկվայի և Վաշինգտոնի միջև բանակցություններում։ Բելառուսի նախագահի խոսքով՝ ինքը «ատում է» միջնորդությունը, քանի որ դա նշանակում է երկու կողմերի միջև դիրքորոշում ընդունել՝ առանց գործընթացի վրա ազդելու իրական հնարավորության։
