Քննչական կոմիտեի նախագահ Արթուր Պողոսյանն այսօր, «Հայաստանի Հանրապետության քննչական կոմիտեի մասին» ՀՀ օրենքի 8-րդ հոդվածի համաձայն, Ազգային ժողովին է ներկայացրել Քննչական կոմիտեի 2024 թվականի գործունեության մասին հաղորդումը:
2024 թվականի ընթացքում Քննչական կոմիտեի վարույթում քննվել է կոռուպցիոն բնույթի հանցագործությունների վերաբերյալ 1,256 քրեական վարույթ, որից 696-ը փոխանցվել է 2023 թվականից:
Նշված 1.256 քրեական վարույթից 62-ը՝ 134 անձի վերաբերյալ մեղադրական եզրակացությամբ ուղարկվել է դատարան: 245 քրեական վարույթ կարճվել է, որից 189-ը՝ ռեաբիլիտացնող, իսկ 56-ը՝ ոչ ռեաբիլիտացնող հիմքերով, 96-ը պասիվացվել է, 235-ն ուղարկվել է այլ մարմին, 147-ը միացվել է, իսկ 471-ը փոխանցվել է 2025 թվական:
Կոռուպցիոն բնույթի հանցագործություններով ավարտված քրեական վարույթներով պատճառված գույքային վնասը կազմել է 4 մլրդ 608 մլն 789 հզր ՀՀ դրամ, որից մինչդատական վարույթի ընթացքում վերականգնվել է 685 մլն 958 հզր ՀՀ դրամը, արգելանք է դրվել 1 մլրդ 739 մլն 386 հզր ՀՀ դրամ արժողության գույքի վրա:
