Կիրակի գիշերը ՌԴ ԶՈւ-ն համակցված հարձակում է իրականացրել Ուկրաինայի վրա՝ օգտագործելով 367 օդային հարձակման զինատեսակ: Դրանց մեծ մասը խոցվել է Ուկրաինայի հակաօդային պաշտպանության համակարգերի կողմից։ ՌԴ-ն կիրառել է 298 հարվածային անօդաչու թռչող սարք, ինչպես նաև տարբեր տեսակի 69 բալիստիկ և թևավոր հրթիռ։ ՀՕՊ-ը խոցել է 45 X-101 և «Կալիբր» թևավոր հրթիռներ։ Նաև մարտական գործողությունների արդյունքում վնասազերծվել է հակառակորդի 266 Shahed անօդաչու թռչող սարք։
Կիրակի գիշերը Ռուսաստանի Դաշնության կողմից իրականացված համատեղ հարձակման հետևանքով 12 մարդ է զոհվել, ևս 60-ը վիրավորվել։ Ռուսական հարձակման հարվածի տակ է հայտնվել 13 մարզ:
ԱՄՆ նախագահ Դոնալդ Թրամփը լրագրողներին ասել է, որ դժգոհ է Կրեմլի առաջնորդ Վլադիմիր Պուտինի գործողություններից՝ կապված Ուկրաինայի վրա զանգվածային հարձակման հետ։ Ռուսական հրթիռներն ու անօդաչու սարքերը հիմնականում թիրախավորել են խաղաղ բնակիչների տները, վնասվել է ավելի քան 80 բնակելի շենք։ Արձանագրվել է հրդեհի 27 դեպք։
ԱՄՆ նախագահ Դոնալդ Թրամփը լրագրողներին ասել է, որ դժգոհ է ՌԴ նախագահ Վլադիմիր Պուտինի գործողություններից՝ կապված Ուկրաինայի վրա զանգվածային հարձակման հետ։
«Ես չգիտեմ, թե ինչ է պատահել Պուտինին: Ես նրան վաղուց եմ ճանաչում: Մենք միշտ ընդհանուր լեզու ենք գտել: Բայց նա հրթիռներ է արձակում քաղաքների վրա և սպանում մարդկանց, և դա ինձ դուր չի գալիս… Եվ այս տղայի հետ ինչ-որ բան պատահեց, և դա ինձ դուր չի գալիս», — ասել է ԱՄՆ նախագահը:
Ավելի ուշ նա այդ թեմայով գրառում է կատարել սոցիալական ցանցում՝ կրկնելով Պուտինի հասցեին իր քննադատությունը և ասել, որ նա «բոլորովին խելագարվել է»։ Այս անգամ Թրամփը նաև խոստովանել է, որ Պուտինը ցանկանում է ամբողջ Ուկրաինան, այլ ոչ միայն դրա մի մասը:
«Բայց եթե նա դա անի, դա կհանգեցնի Ռուսաստանի անկմանը»,- գրել է նա: Թրամփը նաև քննադատել է Ուկրաինայի նախագահ Վլադիմիր Զելենսկիին՝ ասելով, որ «այն ամենն, ինչ նա ասում է, խնդիրներ է ստեղծում»։
