Հայաստանը ակտիվ քայլեր է անում Եվրոմիության անդամ պետություն դառնալու ուղղությամբ, ինչը ենթադրում է խորքային քաղաքական, տնտեսական և իրավական համակարգերի համապատասխանեցում եվրոպական ստանդարտներին։ Իսկ դրա համար մեր օրենքները պետք է մոտեցվեն եվրոպական չափանիշներին՝ հատկապես մարդու իրավունքների, տարբեր ոլորտների կարգավորման, ինչպես նաև նույնասեռ զույգերի իրավունքների ճանաչման հարցերում։ Նիկոլ Փաշինյանից հետաքրքրվեցի Հայաստանը ընդունելո՞ւ է նույնասեռականների ամուսնությունը՝ դառնալով ԵՄ անդամ պետություն։
Նիկոլ Փաշինյանի պնդեց, թե միասեռական ամուսնությունների ճանաչումը կախված է Եվրամիության անդամ պետությունների ազգային առանձնահատկություններից, ինչը չի համապատասխանում իրականությանը։
2025 թվականի նոյեմբերի 25-ին Լյուքսեմբուրգում գործող Եվրոպական միության դատարանը վճիռէ կայացրել, ըստ որի՝ ԵՄ անդամ պետությունները պարտավոր են մասնակի ճանաչել այլ անդամ երկրում օրինականորեն կնքված միասեռ ամուսնությունները։
Դատական հայցը ներկայացրել են Լեհաստանից երկու տղամարդիկ, որոնք ամուսնացել են Բեռլինում 2018 թվականին: Լեհաստանի քաղաքացիական կացության ակտերի գրանցման գրասենյակը հրաժարվել է ճանաչել այն: Սակայն Եվրոպական դատարանը որոշել է, որ նման ամուսնության գրանցումից հրաժարվելը խախտում է ԵՄ օրենսդրությունը, տեղաշարժի և բնակության ազատության իրավունքը, ինչպես նաև անձնական և ընտանեկան կյանքի իրավունքը: Դատարանը նշել է, որ ԵՄ մեկ երկրում օրինականորեն ձեռք բերված ամուսնական կարգավիճակը պետք է ճանաչվի ԵՄ բոլոր երկրներում։
Այսինքն՝ Նիկոլ Փաշինյանը կամ նորից ստում է, կամ տեղյակ չէ ԵՄ օրենքներից և հետևաբար՝ չգիտի, թե ուր է տանում Հայաստանը։ Եվրոպական դատարանի որոշումը նշանակում է, որ, Հայաստանի՝ ԵՄ անդամ դառնալուց հետո պարտավոր է լինելու ճանաչել նույնասեռ անձանց ամուսնությունները։ Սա նշանակում է, որ երկու հայ միասեռական կարող են գնալ օրինակ Գերմանիա, օրինական ամուսնանալ և վերադառնալ Հայաստան, իսկ Հայաստանը պարտավոր է լինելու ճանաչել նրանց ամուսնությունը։
