Երեկ՝ ապրիլի 14–ին, հրազենային վիրավորումով զորամասից հոսպիտալ տեղափոխվելու ճանապարհին մահացած ժամկետային զինծառայող 18-ամյա Նարեկ Արշակի Հակոբյանը Երևանից էր, բնակվում էր ծնողների և իրենից փոքր եղբոր հետ:
Նարեկն այս տարի էր զորակոչվել, ծառայում էր Նուբարաշենի զորամասում:
«Հունվարի 26-ին էր գնացել ծառայության, 3 ամիս էլ չկար: Նուբարաշենում էր ծառայում, 6 ամիսը լրանալուց հետո պետք է տեղափոխվեր Գորիս»,- NEWS.am-ի հետ զրույցում հայտնեց մահացած զինծառայողի եղբայրը, ապա հավելեց, որ վերջին անգամ երկուշաբթի օրն են խոսել Նարեկի հետ. «Երկուշաբթի՝ դեպքից մի օր առաջ ենք խոսել, տրամադրությունը լավ էր…»:
Հիշեցնենք, որ երեկ՝ ապրիլի 14-ին, ժամկետային զինծառայող է մահացել։
Շամշյանի տեղեկություններով մահացածը հոսպիտալ էր տեղափոխվել Նուբարաշենի կրակարաններից (պոլիգոնից)՝ հրազենային վնասվածքով։
Քննչական կոմիտեն հայտնել էր, որ դեպքի առթիվ նախաձեռնվել է քրեական վարույթ՝ Քրեական օրենսգրքի 523-րդ հոդվածի 1-ին մասով (զինծառայողին ինքնասպանության հասցնելը):
Նշանակվել են փորձաքննություններ:
Կատարվում է նախաքննություն՝ դեպքի ամբողջական հանգամանքները պարզելու ուղղությամբ:
