Գորիս համայնքի ղեկավարի տեղակալ Իրինա Յոլյանի ֆեսյբուքյան գրառումը․
Ժողովրդավարության «բաստիոնը» օր օրի փլուզվում է
Տարիներ շարունակ Հայաստանում լուրջ միջոցներ էին ծախսվում ժողովրդավարության, մարդու իրավունքների, անձնական տվյալների պաշտպանության ծրագրերի վրա։ Միջազգային գործընկերները միլիոնավոր դրամներ էին ներդնում՝ համոզելով, որ անձնական կյանքի պաշտպանությունը ժողովրդավարության հիմնասյուներից մեկն է։
Սակայն այսօր նույն իշխանությունը հերթական անգամ գնում է ճիշտ հակառակ ուղղությամբ։
Կառավարությունը հավանություն է տվել IMEI կոդերի միասնական շտեմարանի ստեղծման նախագծին։ Այն ներկայացվում է որպես ստվերի դեմ պայքարի, գողացված հեռախոսների հայտնաբերման և շուկան կարգավորելու միջոց։
Այս նախագիծը վերաբերում է ոչ միայն հեռախոսներին։ Այս համակարգով փորձ է արվում իմանալ, թե ով ես, ինչ սարք ես օգտագործում և ինչ SIM կամ eSIM քարտով ես օգտվում կապի ծառայություններից։ Եվ այստեղ առաջանում է գլխավոր հարցը՝ որտե՞ղ է այն կարմիր գիծը, որից այն կողմ անձնական կյանքի և տվյալների տիրույթը պետք է պաշտպանված լինի ցանկացած միջամտությունից։
Իսկ ո՞վ կարող է բացառել, որ վաղը այս տեղեկատվական բազան երբեք չի օգտագործվի քաղաքական նպատակներով։ Ո՞վ է պատասխանատվություն կրելու, եթե տվյալները արտահոսեն, դառնան կիբերհարձակման թիրախ կամ օգտագործվեն իրենց սկզբնական նպատակից դուրս։
Այս հարցերին հասարակությունը հստակ պատասխան չունի, որովհետև, ինչպես միշտ, «ժողովրդավարության բաստիոնում» կարևոր որոշումները կայացվում են քաղաքացիների թիկունքում։
