Արմեն Աշոտյանը, ինչպես միշտ, հիմա ևս մեծ սիրով պատրաստ է, ցանկություն ունի լրագրողների հետ շփվելու, բայց երկրորդ գործով սահմանափակումները վերաբերում են, ըստ էության, նաև առաջին գործի ժամանակ նրա վարքագծին։ Այս մասին ՀՀԿ փոխնախագահ Արմեն Աշոտյանի գործով դատական նիստից հետո ասել է փաստաբան Ռուբեն Մելիքյանը:
Ըստ դատարանի որոշման՝ Արմեն Աշոտյանի հետ շփման սահմանափակումներ կան, բացի ընտանիքի անդամներից և պաշտպաններից, այլ մարդկանց հետ նրա շփումն արգելված է:
«Մենք հիշում ենք, որ առաջին քրեական վարույթի ժամանակ, կարծեք ավանդույթ էր ձևավորվել, դատարանն էլ հաստատել էր այդ ավանդույթը, որ դատական նիստերի դահլիճի սահմաններում, մինչև մեկ րոպե տևողությամբ որոշ հարցեր էին տրվում, մինչև Արմեն Աշոտյանը դուրս էր գալիս: Կարծում եմ՝ դատարանը հրապարակեց այդ որոշումն այն պատճառով, որ մենք չկարծենք, թե նույն կանոններն այստեղ են գործում»,-նշել է նա:
Մելիքյանը պարզաբանել է, որ լրագրողների հետ շփման բացակայությունը պայմանավորված է ոչ թե իրենց կամ Արմեն Աշոտյանի կամքով, այլ վերջինիս դեմ երկրորդ գործի հիմքով: Նա նշել է՝ բնականաբար այդ որոշման հետ համաձայն չեն:
«Ես ուզում եմ հատուկ նշել շատ կարևոր, քիչ պատահող դեպք, երբ միջազգային կառույցը, մասնավորապես՝ CDI-ը, որը քաղաքական կուսակցությունների ընտանիք է, ինչ-որ տեղ կարելի է EPP-ի ավելի գլոբալ համարժեքը համարել, մոտ մեկ ամիս առաջ, հունիսի կեսերին, շատ հստակ անդրադարձել է Արմեն Աշոտյանի գործին, իր մտահոգությունն է հայտնել և հիշեցրել առաջին գործով նրան քաղբանտարկյալ ճանաչելու մասին։
Այսինքն՝ այս գործը նույնպես, որոշակի միջազգային ուշադրության կենտրոնում է և մենք անկեղծորեն հույս ունենք, որ այս անազատությունը երկար չի տևելու»,-նշել է փաստաբանը։
