Կառավարության նիստում վարչապետ Նիկոլ Փաշինյանը հայտարարեց, որ ՀՀ փոխվարչապետ Մհեր Գրիգորյանը երեկ Մոսկվայում շփումներ է ունեցել Ռուսական երկաթուղիներ ընկերության հետ։
Ըստ Փաշինյանի՝ ռուս գործընկերները հավաստիացրել են, որ հնարավորինս ամենասեղմ ժամկետներում երկաթուղին կվերականգնվի։
Նա կարծում է՝ սա շատ կարևոր է։
ՏԿԵ նախարար Գնել Սանոսյանն իր հերթին նշեց, որ ինքը ևս խոսել է Մհեր Գրիգորյանի հետ և հավելեց, որ Այրում Կայարանից դեպի Ալավերդի երկաթգիծը վերականգնելու համար բավական ժամանակ կպահանջվի։
Ըստ Սանոսյանի՝ լուծում են գտել, որ բեռները տեղափոխեն մինչև Այրում կայարան, այնտեղ հարակից հատվածում կա մի կամուրջ, որը երկար ժամանակ չի աշխատել, դա երկաթուղային կամուրջ է, վերափոխում են, որպեսզի դրա վրայով կարողանան բեռնատարներ անցնել: Առաջիկա 2-3 օրում կավարտեն: Այս սխեման պայմանավորվել են։
Նա հավելեց, որ այս պահին Ալավերդի քաղաքում աշխատում է մոտ 250 կամավոր:
Նա նաև նշեց, որ Վրաստանում էլ է երկաթուղին վնասված և ինքը Վրաստանի փոխվարչապետի հետ էլ է խոսել, մինչև երեքշաբթի երկաթգծի աշխատանքը կվերականգնվի։
