Asekose.am-ի «Բացարձակ արժեք» հաղորդման հյուրը ՀՀ վաստակավոր արտիստուհի՝ Իրինա Հարությունյանն էր։
StarNews-ը հետևեց հարցազրույցին ։
Շատերը գիտեն, որ շաբաթներ առաջ դերասանուհու որդու՝Արամի նշանադրությունն էր։ Այս անգամ մենք համացանցում Իռա Հարությունյանին տեսանք այլ կարգավիճակում՝ շատ ակտիվ, ոգևորված սկեսուրի.
«Այո դա մեծ իրադարձություն էր իմ և առհասարակ ընտանիքիս կյանքում։ Անկեղծ լինեմ` ես տղա ունենալով միշտ պատկերացնում էի, թե ինչ կզգամ և ինչ կապրեմ, եթե այդ օրը գա։ Այդ օրը եկավ… Բացարձակ այլ վիճակ է ներսումս տիրում, որովհետև ես ամբողջ կյանքում երազել էի աղջիկ ունենալ՝ երազանքս կատարվեց։ Չեմ տարանջատում իմ տղա, հարս անվանումը մեր հարաբերություններում, մեր տրամադրվածությունում։ Մեր մոտ շփման, ծանոթության ամբողջ ընթացքում ձևավորվեց ուրիշ հարաբերություններ, և ես շատ-շատ երջանիկ եմ։ Աստծո օրհնությամբ` մյուս տարի էլ լիովին կլինի իմ աղջիկը»,-նշեց Իրինան:
Դերասանուհին խոսեց անակնկալ առաջարկության, կազմակերպչական գաղտնի ընթացքի, իր անմիջական մասնակցության և էմոցիաների մասին։
«Արժեր, որ իմ Էլենան այդ էմոցիաները զգա։ Ես իրեն ծննդյան օրը դեռ ասեցի, որ կյանքով մեկ միշտ սյուրպրիզներ է լինելու իր մոտ։ Ես պատրաստ եմ, որովհետև իրեն շատ սիրել և իրոք աղջիկ եմ ունեցել»։
«Իրենք դեռ ջահել են, նոր-նոր քայլեր են անում, կարող են սխալվել, բա մեծերն ինչի՞ համար են։ Ինքը դե փոքր է տարիքով, միամիտ, բարի երեխա է։ Ես պետք է ամեն ինչ անեմ,որ կողքին լինեմ։ Վերջերս մի հոլովակ տեսա, որտեղ աղջիկը` դեռ հարսի շորով նստած, սկեսուրը ասում է` դե ասա մամա ու այդ աղջիկը ստիպված ասում է։ Թող մամա չասի, ավելի լավա ծյոծյա ասի, ինչ ուզում է ասի, բայց ստիպված չասի»։
Իրինան խոսեց տղայի առողջության հետ կապված լուրջ խնդրի և հետագա արժեքների մասին.
«Տարիներ առաջ փոքրիկս հանկարծակի հայտնվեց հիվանդանոցում՝ բավականին ծանր առողջական խնդիր ուներ։ Դրանից մի տաս օր առաջ ես ինչ-որ խնդիրների մեջ էի, լացում էի, տառապում էի։ Ես, որ մտա հիվանդանոց ու տեսնելով` ինչ է կատարվում, արժեքներս փոխվեցին։ Մեր արժեքները շատ ժամանակ խառնվում են։ Դուրս եկա այնտեղից լրիվ ուրիշ մարդ։ Նման մի իրավիճակում էլ հայտնվեցի անցած տարի մեծ տղայիս հետ, երբ փոքր առողջական խնդիր կար»։
